Atvinnulífssýning dagana 19. og 20. september

Atvinnulífssýning verður haldin í íþróttahúsinu á Sauðarkróki í haust eða dagana 19. og 20. september.

Sýningunni er fyrst og fremst ætlað að varpa ljósi á flóru fyrirtækja og stofnana í þjónustu, framleiðslu, mannlífi og menningu í sveitarfélaginu. Reiknað er með að á milli fjögur og fimm þúsund manns sæki sýninguna.

„Við hér í Skagafirði erum svo ótrúlega lánsöm að búa yfir fjölbreyttu og öflugu atvinnulífi. Smá og stór fyrirtæki eru lífæð samfélagsins og það er því ótrúlega gaman að geta búið til vettvang fyrir þessa aðila til að koma saman og kynna sig og sína þjónustu eða vöru. Á sýningunni munum við sýna flóru fyrirtækja sem styðja við grunnstoðir atvinnulífsins í Skagafirði. Þá ætlum við einnig að leggja okkur fram við að bjóða upp á málstofur þar sem einstaklingar úr öllum áttum atvinnulífsins koma saman og ræða framtíðarsýn Skagafjarðar í atvinnumálum, sérstöðu sveitarfélagsins, mikilvægi nýsköpunar og verðmætasköpunar svo fáeitt sé nefnt. Þá ætlum við einnig að bjóða upp á skemmtidagskrá fyrir alla aldurshópa og vera með ýmsar óvæntar uppákomur meðan á sýningunni stendur,“ segir María Neves, deildarstjóri þróunar, miðlunar og menningar hjá Sveitarfélaginu Skagafirði.