Erlendir starfsmenn ráðnir sérstaklega
Sauðfjárslátrun hjá SS á Selfossi hefst formlega 8. september í haust og stendur til 4. nóvember. Reiknað er með að slátra um hundrað þúsund fjár.
„Það verða um hundrað og fimmtíu manns að vinna í sláturtíðinni og hundrað af þeim koma sérstaklega til landsins til að vinna hjá okkur þetta tímabil,“ segir Benedikt Benediktsson, framleiðslustjóri hjá SS.
Á heimasíðu fyrirtækisins kemur meðal annars fram að 4% hækkun verði á verðskrá kindakjöts og ofan á það greiðir SS svo bændum 8% í viðbót ofan á verðskrá sauðfjárinnleggs eins og fyrri ár. Þá kemur líka fram að bændum standi til boða að kaupa frosið dilkakjöt með afslætti í sláturtíð en ekki er um að ræða heimtöku á innleggi viðkomandi bónda.
En hvað segir formaður Félags sauðfjárbænda um verðið sem bændur fá fyrir sitt fé í haust? „SS er eina afurðastöðin sem hefur gefið út verðskrá fyrir haustið og afurðaverð fylgir þróun verðlags síðan í síðustu sláturtíð, eða um 4%. Sauðfjárbændur hefðu viljað sjá frekari hækkun á afurðaverði til sín en eins og í tilviki SS þá vita bændur að sú afurðastöð greiðir uppbót í lok árs ef rekstur félagsins gengur vel. Sauðfjárbændur sýna þessari hóflegu hækkun þó skilning í því verkefni að reyna að halda aftur af miklum verðlagshækkunum. Aftur á móti bendum við líka á að aðföng til framleiðslunnar hafa hækkað frá síðasta ári, olía hefur hækkað umtalsvert milli ára, áburður hækkaði milli ára svo dæmi séu tekin,“ segir Eyjólfur Ingvi Bjarnason, formaður sauðfjárbænda.
