Moskítóflugur og mítlar

Vöktun á moskítóflugum, mítlum og lúsmýi heldur áfram í sumar. Almenningur er hvattur til að tilkynna grun um moskítóflugur til Náttúrufræðistofnunar og safna mítlum sem finnast á fólki eða dýrum. Moskítóflugur fundust í fyrsta sinn á Íslandi síðastliðið haust.

Vöktun á svokölluðum smitferjum heldur áfram í sumar. Smitferjar eru til dæmis moskítóflugur, mítlar og lúsmý. Talið er mikilvægt að fylgjast með þróun mála hvað varðar moskítóflugur eftir að þær fundust í fyrsta sinn á Íslandi síðastliðið haust. Matvælastofnun í samvinnu við Náttúrufræðistofnun og Tilraunastöð Háskóla Íslands í meinafræði að Keldum fylgist með þessum lítt velkomnu gestum.

Moskítóflugur af tegundinni Culiseta annulata fundust í Kjós í fyrra. Tegundin er útbreidd víða í Evrópu og er stórvaxin. Hún hefur lagað sig að fremur köldu loftslagi og lifir veturinn af á fullorðinsstigi með því að leita skjóls svo sem í útihúsum og kjöllurum. Óþekkt er hvernig hún barst til Íslands en talið líklegt að hún hafi komið með vöruflutningum. Samkvæmt vef Náttúrufræðistofnunar bendir allt til að hún geti lifað við íslenskar aðstæður. Hlýnandi loftslag og auknir flutningar eru taldir skýra þann vaxandi fjölda nýrra skordýrategunda sem hafa greinst á Íslandi á undanförnum árum.

Finnist mítill á dýri eða manneskju er almenningur og dýralæknar hvattir til að skila sýnum til Náttúrufræðistofnunar eða Tilraunastöðvar HÍ að Keldum. Upplýsingar skulu fylgja um dagsetningu fundar, fundarstað, hvort hýsill var dýr eða maður og hvar sá hinn sami hefur haldið sig undanfarna daga. Tilkynningar um grun um moskítóflugur skulu sendar til Náttúrufræðistofnunar og þeim skal fylgja staðsetning fundar og ljósmynd sé þess kostur.