Vinningspeysan „Í Uppsveitum“

Á dögunum fór fram hönnunarsamkeppni um lopapeysu kvenbóndans en árið 2026 er, samkvæmt Sameinuðu þjóðunum, einmitt ár kvenbóndans.

Uppspuni, smáspunaverksmiðja í Lækjartúni í Ásahreppi, þar sem Hulda Brynjólfsdóttir ræður ríkjum, stóð í síðasta mánuði fyrir keppninni, en yfir tuttugu peysur bárust og átti dómnefnd erfitt með að velja sigurpeysuna. Það fór þó þannig að vinningspeysan kom frá Helgu Linnet í Hafnarfirði. Hún ber nafnið Í Uppsveitum og hlaut Helga glæsileg verðlaun fyrir peysuna.

Peysurnar í öðru og þriðja sæti voru líka verðlaunaðar, ásamt frumlegustu peysunni, og gestir við verðlaunaafhendingu völdu sína peysu.

Trausti Hjálmarsson, formaður Bændasamtakanna, hélt stutt ávarp við athöfnina og þakkaði Huldu fyrir frumkvæðið og þátttakendum fyrir að taka þátt í þessari skemmtilegu hönnunarsamkeppni.