1.500 krónur ferðin yfir nýja brú

– Mikil óánægja með verðskrána

Nýr Hringvegur um Hornafjörð með nýrri brú var formlega opnaður miðvikudaginn 24. júní. Óánægja er með kostnað við að aka yfir brúna.

Hægt verður að aka ókeypis yfir brúna fyrstu vikurnar en frá 1. september í haust hefst gjaldtaka, sem margir heimamenn, ekki síst í sveitunum, eru ekki sáttir við eins og sauðfjárbændurnir á Kálfafelli í Suðursveit.

„Þessi gjaldskrá mun einfaldlega hafa þau áhrif að við munum ekkert nýta okkur brúna. Planið var að yngsta barnið, sem hefur hingað til farið 2 daga vikunnar í leikskólann, færi núna 3 daga. Við erum ekki að fara að sjá það gerast miðað við þessar forsendur. Við myndum alltaf keyra gömlu leiðina. Verðskránni er stillt þannig upp að fólk eigi bara að keyra þarna eina ferð. Það er óskiljanlegt af hverju þetta þarf að vera svona dýrt, við skiljum það bara ekki,“ segir Aðalbjörg Bjarnadóttir bóndi.

Eiginmaður hennar, Bjarni Haukur Bjarnason, tekur undir: „Kostnaðurinn á ári myndi fara fast að 200.000 krónum fyrir okkur og er það svipuð upphæð og nýja kílómetragjaldið er á ári, það er stór biti fyrir okkur. Þetta hefur líka bein áhrif á vöruverð í samfélaginu þar sem þessi upphæð mun leggjast á allan flutning til og frá sveitarfélaginu. Við viljum sjá enga verðskrá þar sem allar forsendur fyrir gjaldtöku eru brostnar. Það er mikil óánægja með þetta hér í sveitinni og víðar þar sem þarna virðist ekki gætt sanngirni. Það hafa verið fleiri nýir vegir lagðir hér á landi sem ekki er gjaldskylda á. Við viljum sjá bæjarstjórn Hornafjarðar beita sér harðar í þessu máli fyrir okkur íbúa,“ segir Bjarni Haukur.