Vinsamlegast athugið að þetta efni er eldra en 3 mánaða.
Hægeldaður lambabógur
Matarkrókurinn 6. júní 2023

Hægeldaður lambabógur

Höfundur: Hafliði Halldórsson

Þegar þetta er ritað lekur slyddan niður rúðuna og fátt minnir á vor, sumar og grillmat sem sam- kvæmt almanakinu ætti að vera umfjöllunarefnið núna í lok maí.

Við skulum samt ekki örvænta, það kemur á endanum og þá burstum við rykið af grillinu og njótum okkar í sólinni. En þar sem útsýnið hefur þau áhrif að vetrarmatur er mér ofarlega í huga læt ég vaða á hægeldaðan og bragðgóðan rétt sem á svo sem líka við í íslensku vori eins og það gerist best, rétt slefandi í tveggja stafa tölu yfir hádaginn.

Einn af vanmetnustu bitum lambsins, sem og annarra ferfætlinga, er bógur sem of fáir hafa prófað að matreiða. Til að gera góðan mat úr bóg þarf aðallega ögn af þolinmæði og skipulagi. Best er að bógurinn fái langan eldunartíma á lágum hita. Þá verður niðurstaðan sannkölluð veislumáltíð.

Hér er mælt með 5 tímum að lágmarki fyrir lambabóg, en ekki er síðra að gefa bógnum 7-8 klst. í ofninum. Í skipulaginu þýðir það að með smá undirbúningi deginum áður en hann er eldaður má brúna og krydda kjötið og skella svo í ofninn áður en fólk fer til vinnu að morgni og eiga svo von á góðu þegar heim er komið.

Meðlætið er einfalt og fljóteldað, og má einnig undirbúa það deginum áður að stórum hluta.

Hægeldaður lambabógur með maís, smælki, grilluðu flatbrauði og hrásalati

Fyrir 4 pers.
Tími 5 1⁄2 klst.

  • 1,5 kg lambabógur
  • 2 msk. matarolía
  • Salt & pipar
  • 1 kanilstöng
  • 1 msk. reykt paprikuduft
  • 1 msk. broddkúmen
  • 1 msk. fennelfræ
  • 2 kvistar ferskt timían
  • 1,5 l vatn
  • 1 l lambasoð
  • 1 stk. hvítlauksgeiri
  • 1 msk. púðursykur
  • 1 stk. laukur
  • 5 stk. sveppir
  • 1⁄2 sítróna

Stillið ofninn á 90 °C. Nuddið bóginn með salti og brúnið á vel heitri pönnu með olíunni á háum hita í 3-5 mínútur á hvorri hlið.

Setjið bóginn í djúpa ofnskúffu, nuddið kryddinu á og bætið við restinni af því sem fram kemur í uppskriftinni, breiðið yfir með álpappír (eða setjið í ofnpott með loki) og eldið í a.m.k. 5 klst. En ekki er síðra að teygja eldunartímann í 7-8 klst.

Ristaður maís
  • 4 stk. foreldaðir maísstönglar
  • 100 g smjör
  • 50 ml olía
  • íslenskt sjávarsalt

Penslið maísstönglana með olíunni og stráið salti yfir. Grillið eða steikið á pönnu, vel á öllum hliðum, áður en stöngullinn er smurður með smjörinu og borinn fram.

Sósa
  • Steikingarsafi
  • 50 g kalt smjör

Sigtið safann úr ofnskúffunni í pott þegar lambakjötið hefur verið eldað, haldið kjötinu heitu. Fleytið megnið af fitunni af og látið vökvann sjóða niður um þriðjung.

Takið pottinn af eldavélinni og pískið smjöri saman við í litlum bitum, bragðbætið með salti og pipar og sítrónusafa eða ediksslettu eftir smekk.

Ofnbakað smælki með sýrðum rjóma
  • 300 g kartöflusmælki
  • 2 hvítlauksgeirar
  • 50 g ólífuolía
  • íslenskt sjávarsalt
  • 100 ml sýrður rjómi
  • 10 ml sítrónusafi
  • 1 tsk. hunang

Hitið ofn í 180 °C. Skolið kartöflurnar og þerrið. Sjóðið þar til eru mjúkar, sigtið vatnið frá og setjið kartöflur í ofnskúffu. Bætið við olíu, hvítlauk og salti eftir smekk. Bakið í 25 mínútur. Blandið sýrða rjómanum, sítrónusafanum og hunanginu saman í skál og bragðbætið með salti eftir smekk. Veltið kartöflunum upp úr blöndunni og berið fram.

Grillað flatbrauð
  • 120 ml volgt vatn
  • 1 msk. góð ólífuolía
  • 1 tsk. salt
  • 1⁄2 tsk. þurrger
  • 220 g hveiti

Setjið vatnið og þurrgerið saman í skál og bíðið í 5 mínútur. Bætið við olíu, hveiti og salti og blandið vel saman. Hnoðið deigið þar til mjúkt og látið hefast í 30 mínútur. Stillið ofninn á 225 °C eða hafið pönnu vel heita. Fletjið deigið út í 1 cm þykkt og skerið í ákjósanlegar stærðir.

Burstið olíu á báðum hliðum og grillið eða steikið á pönnu í 2 mínútur á hvorri hlið, eða setjið í forhitaðan ofninn í 4-5 mínútur. Penslið aftur með olíu og stráið yfir þurrkuðum jurtum að eigin vali.

Hrásalat
  • 1⁄2 haus rauðkál – niðurskorið
  • 2 stk. gulrætur – rifnar niður
  • 100 ml eplaedik
  • 100 g sykur
  • salt og pipar

Setjið sykur og eplaedik í pott og leyfið suðunni að koma upp. Leyfið blöndunni að kólna áður en rauðkálinu og gulrótunum er bætt við. Bragðbætið með salti og pipar. Þessa uppskrift er tilvalið að gera í magni og geyma í loftþéttu íláti í ísskápnum.

Skylt efni: lambakjöt

Veturgamalt í vetur
Matarkrókurinn 28. september 2023

Veturgamalt í vetur

Lambakjötið er nú flest allt komið úr dölunum, af fjöllum og heiðum. Þar sem það...

Steikt lamba rib-eye
Matarkrókurinn 14. september 2023

Steikt lamba rib-eye

Haustið er komið og með því göngur og réttir í sveitum landsins og meðfylgjandi ...

Miðaldramanna-salat
Matarkrókurinn 31. ágúst 2023

Miðaldramanna-salat

Árin færast hratt yfir og miðöldrunin gengur vel. En svo byrjar að smella í öllu...

Hamborgari
Matarkrókurinn 16. ágúst 2023

Hamborgari

Góður hamborgari á allar sínar vinsældir skilið, en er samt auðvitað bara hambor...

Stórsteikur á sumargrillið
Matarkrókurinn 18. júlí 2023

Stórsteikur á sumargrillið

Stundum, kannski eins og einu sinni yfir sumartímann, reynist löngunin í vel fit...

Grilluð harissa-kjúklingalæri
Matarkrókurinn 4. júlí 2023

Grilluð harissa-kjúklingalæri

Öllum þykir grillmatur góður, eða svona næstum því, og svo sannarlega grilla Ísl...

Grill/rigningarsumarið mikla
Matarkrókurinn 20. júní 2023

Grill/rigningarsumarið mikla

Það er kominn júní og það þýðir að, hvað sem tautar og raular, grilltímabilið er...

Hægeldaður lambabógur
Matarkrókurinn 6. júní 2023

Hægeldaður lambabógur

Þegar þetta er ritað lekur slyddan niður rúðuna og fátt minnir á vor, sumar og g...