Vísnahornið
Stera-Pétur læknir fékk sitt auknefni vegna ummæla er féllu, varðandi notkun kraftamanna á sterum sem valdið gætu rýrnun ákveðins líffæris. Þá orti Hjálmar Freysteinsson læknir þessa niðurstöðu:
Alveg þykir augljóst vera
enginn þarf að rengja það
að þeir sem nota þessa stera
þurfa minna fíkjublað.
Hjálmar Freysteinsson orti þessa vísu, sem hann kallar Eftirsjá:
Á feril minn ég mat hef lagt,
mistakanna iðrast hlýt.
Ég hef alltof sjaldan sagt
sjúklingum að éta skít.
Davíð Hjálmar Haraldsson er vel kunnur fyrir sinn kveðskap, oft er þar kímnin í fyrirrúmi. Hér má sjá nokkrar hrútavísur:
Vákur minn er vaskur enn
og völlur oft á kalli.
Geta fáir gangnamenn
gómað hann á fjalli.
Svo er það afrekskappinn Bjartur:
Bjartur þykir kempa kná,
kvikna um hann sögur
syndi hann í Seldalsá
og sumarlangt við Gjögur.
Og svarti (sauðurinn) Blakkur:
Augu hefur Blakkur blá.
Ber ei svip af dóna
þótt við garðann strá og strá
stundum fari í króna.
Um blíðuna nyrðra segir Davíð Hjálmar:
Skemmtun er mörgum að skvetta úr klauf
og skopppa um ilmandi balann o
g búsmali unir við blómknúpp og lauf.
Ég baula og sperri upp halann.
Við sem búum hér á suðurhlutanum þurfum að fá nokkra þurra daga á næstunni, sumir til að þurrka hey. Pétur Stefánsson orðar það svona:
Síður kætir suddinn lýð,
sumum vekur pínu.
Farðu burtu blauta tíð,
burt úr lífi mínu.
Friðrik Steingrímsson leggur til þessa veðurlýsingu úr Mývatnssveit:
Væn er tíð í vikulok
vaxa grös í hlíðum
sextán metra sunnan rok,
sól með heita blíðum.
Og Friðrik yrkir þessa um Trump, sem alltaf er í fréttum vegna einhvers, orti þessa vegna læknisskoðunar á Dónaldi:
Trump er hraustur yst sem innst
er því sæll að vonum
ekki var þó orði minnst
á andlegt stand á honum.
Meint og meinað segir Þórarinn Eldjárn um alvöru lífs og loka:
Ég vil meina það sem ég meina
eiga meiningu hreina og beina.
Það vegur þyngst
þar til mér syngst.
Allt eins og blómstrið eina.
Eyjólfur Ó. Eyjólfsson orti þessa í tilefni gjafa Erdogan, til leiðtoga landa í Atlantshafsbandalaginu:
Heim kom hún Kristrún með krafti
og klóin á byssunnar skafti
glögglega sást,
en sumum finnst skást
að Sigmundur heldur nú kjafti.
Umsjón: Magnús Halldórsson
mhalldorsson0610[hjá]gmail.com
