Smekkir á ketti til að þeir veiði ekki fugla

Guðrún Gauksdóttir, sem býr í Kaldaðarnesi í Árborg, á þrjá ketti, sem heita Kúri, sem er tvítugur, Vigdís, sem er 12 ára og svo Kiró, sem er 10 ára. Hún er alltaf með smekki á þeim á vorin og sumrin  þegar þeir fara út.

„Já, ég hafði leitað ýmissa leiða til að koma í veg fyrir að kisurnar veiddu fugla, ól með bjöllum og þess háttar. Auðvitað er eina örugga leiðin að halda þeim inni vor og sumur en það gengur nú misjafnlega ef þeir eru á annað borð útikettir. Elsti kötturinn okkar var orðinn mjög fær í að opna glugga. Hann er reyndar kominn á eftirlaun, orðinn tvítugur, og lætur sér nægja að njóta þess að horfa á fuglana út um gluggann. Svo rakst ég á umfjöllun um svokallaðan „catbib“ eða kattarsmekk á vefnum. Trúði fullyrðingunum um ágæti hans svona mátulega en ákvað að prófa,“ segir Guðrún.

- Og hvernig gekk? – „Mjög vel en nú er komin sjö ára reynsla og satt að segja man ekki hvenær þær færðu mér fugl síðast. Ég get ekki séð að smekkirnir hái þeim að ráði, nema í veiðum. Smekkurinn er úr léttu efni og þeir geta  stokkið upp á borð í þvottahúsinu og fengið sér að borða. Það tók auðvitað smá tíma fyrir þá að venjast því að hreyfa sig með smekkinn en ekki langan. Einn af köttunum flutti til okkar í fyrra en hann er 10 ára og þetta er því annað sumarið hans með smekkinn. Gengur mjög vel. Smekkurinn virkar þannig að þegar þeir setja sig í veiðistellingar þá flækist hann fyrir og gerir þeim erfitt fyrir að læsa klóm og kjafti í fuglana,“ segir Guðrún Gauksdóttir.