Maggi og Bessi bestir
Íslandsmótið í tvímenningi 2026 í bridge fór fram í Síðumúlanum, höfuðstöðvum Bridgesambands Íslands, síðustu helgina í febrúar. Íslandsmeistarar síðasta árs, landsliðsmennirnir Magnús MagnússonSigurbjörn Haraldsson, gjarnan kallaðir Maggi og Bessi, hömpuðu gullinu annað árið í röð af nokkru öryggi, skoruðu 61,74 prósent. Gunnar B. Helgason-Hrannar Erlingsson tóku silfrið og Matthías ÞorvaldssonBjarni H. Einarsson bronsið.
Í spili 70 í mótinu mátti vinna 3 spaða á 4-3 samlegu en aðeins 7 slagir eru í grandsamningi. Sigurbjörn og Bessi sátu í AV í spilinu. Sagnir gengu þannig að opnað var á grandi, Sigurbjörn í vestur passaði fumlaust á þessum hættum og velti öðru aldrei fyrir sér. Í mótinu bar nokkuð á því að spilarar beittu innákomum á sterkt grand með háskalegum afleiðingum á hættunni. Eftir pass Bessa sagði norður 2 spaða sem var áskorun í geim en neitaði fjórlit í hálit. Pass hefði verið betra! Suður sló af í 2 gröndum en eftir laufútspil Sigurbjörns fór sá samningur einn niður og ágætt skor til Íslandsmeistaranna.
Stórfrétt úr Úrvalsdeildinni
Sá merki viðburður varð á dögunum að sigurvegarar í Úrvalsdeildinni í bridds, sem fram fer í beinni sjónvarpsútsendingu hjá Símanum klukkan 19 á föstudagskvöldum, eru fallnir úr keppni eftir tvö töp í röð. Sveit Infocapital, skipuð mörgum öflugustu spilurum landsins, hefur alla jafna verið nánast ósigrandi. En allt getur gerst í bridds og liðsmenn Infocapital urðu undir í viðureignum sínum, annars vegar við Sölufélag garðyrkjumanna og hins vegar gegn Seníorum. Útspil Stefáns Jónssonar frá hjartadrottningu þriðju gegn 3 gröndum þegar hann átti fjórlit í spaða tryggði SFG sigurinn í annars jöfnum leik.
Allt getur enn þá gerst í Úrvalsdeildinni. Lesendur Bændablaðsins með áhuga á bridds eru hvattir til að nýta sér hlekk á bardagana sem birtur er á Facebook-síðunni Bridgespjallið rétt fyrir viðureignir ef þeir eru ekki með sjónvarpsáskrift frá Símanum.
Gaman hefur verið að sjá Úrvalsdeildina taka á sig fjölþjóðlegan blæ með þátttöku vina okkar Færeyinga. Ekki er útilokað að fleiri erlendar sveitir taki þátt ef Úrvalsdeildin heldur áfram næsta haust. Vinsældir bridds sem sjónvarpsefni eru að aukast.
Umsjón: Björn Þorláksson.
bjornthorlaksson[hjá]gmail.com
