Vinsamlegast athugið að þetta efni er eldra en 8 mánaða.
Guðni Ágústsson kom skagfirskum sveiflukóngi rækilega á óvart
Mynd / Árni Gunnarsson
Líf og starf 4. janúar 2022

Guðni Ágústsson kom skagfirskum sveiflukóngi rækilega á óvart

Höfundur: GRJ - HKR

Geirmundur Valtýsson hefur sungið fyrir þjóðina í 65 ár og þar af með hljómsveit Geirmundar Valtýssonar í 50 ár, eða hálfa öld. Í tengslum við ritun bókar sinnar, Guðni á ferð og flugi, heimsótti Guðni Ágústsson, fyrrverandi landbúnaðarráðherra, Geirmund í sumar á Geirmundarstaði þar sem hann rekur bú. Þar áttu þeir hressilegt spjall líkt og lesa má í bók Guðna.

Í máli Geirmundar kom fram að hann vildi eignast hryssu undan stóðhestinum Glaumi sem áður var í hans eigu. Nú ætti hann enga meri undan Glaumi. Geirmundur taldi mikilvægt að Glaumsgenin kæmu aftur heim. Guðna þótti við hæfi að Skagfirðingar myndu heiðra söngvaskáldið sitt. Þegar hann hélt sæll og saddur frá Geirmundarstöðum hét hann því að fá héraðsmenn í lið með sér og gefa Geirmundi hryssu undan Glaumi.

Kom sveiflukónginum rækilega á óvart

Guðni sætti lagi í útgáfuhófi sem hann hélt í Kakalaskála í Skagafirði vegna útgáfu nýju bókarinnar. Hann fékk sveiflukónginn til að taka nokkur lög á nikkuna, en kom honum síðan rækilega á óvart þegar þeir feðgar, Bjarni Maronsson og Kolbeinn sonur hans, leiddu hryssuna Sóleyju frá Búðardal inn á gólfið í Kakalaskála, en hryssan er undan áðurnefndum Glaumi. Með gjöfinni vildu vinir Geirmundar þakka sveiflukónginum fyrir að hafa haldið uppi fjöri hjá þjóðinni með spili og söng öll þessi ár.

Ferðalag Guðna Ágústssonar um sveitir landsins við að kynna  nýja bók sína, kveikti hugmynd að merkilegri uppákomu í Kakalaskála. 

Í ávarpi sínu þakkaði Guðni sérstaklega Mínervu Björnsdóttur, eiginkonu Geirmundar, fyrir að hafa gefið þjóðinni svo stóran hlut í Geirmundi enda væri hann flestar helgar af bæ þar sem hann þeyttist um og skemmti landanum. Nefndi Guðni einnig í ávarpinu að Geirmundur hefði með blíðum söng sínum leitt varir að vörum og vanga að vanga hjá hinum ástföngnu, og þúsundir hjónabanda hefðu orðið til undir seiðandi tónlist söngvaskáldsins.

Gleði og glaumur glumdu í Kakalaskálanum og vísur flugu óspart af vörum gesta. Ein varð þó til daginn áður er séra Hjálmar Jónsson lagði niður störf við að elta golfkúlu á Spáni. Hann orti þetta þakklætisljóð til Geirmundar sem Guðni flutti í Kakalaskála:

Hann þreytist ei böll á að bruna,

bestur með harmonikkuna,

og hefur með drift

síðpilsum svipt

lengur en elstu menn muna.

Við hrífumst af hljómþýðum dyni

frá heiðruðum félaga og vini.

Hún er glæst, þessi höll.

Hér gleðjumst við öll

með Geirmundi Valtýssyni.

 

Það fer ekki á milli mála

að mæti hver einasta sála

því Guðni og Geiri

og gæðingar fleiri

nú skemmta í Kakalaskála.

Magnús Ólafsson frá Sveinsstöðum í Húnaþingi flutti svo Geirmundi svohljóðandi kveðju: 

Ungur steigstu upp á svið.

Urðu dansar fleiri.

Ástir kvikna ólgum við,

enda rómó Geiri.

Ávallt fjörið er við völd,

atlot ná að beði.

Hartnær muntu í heila öld

halda uppi gleði.

 

Unaðsstundir þökkum þér,

því af Glaumsins kyni,

gæðahryssu gefum vér

Geira Valtýssyni.

 

Geirmundur var mjög glaður með gjöfina og aðspurður sagði hann nú á dögunum að Sóley yndi hag sínum vel á Geirmundarstöðum en þar reka þau hjónin bú og halda um hundrað ær og nokkur hross. Magnús Eiríksson tónlistarmaður sagði í frægu lagi sínu að sérhver vegur að heiman væri vegurinn heim. Ljóst er því að ættbogi Glaums er kominn aftur á Geirmundarstaði.


Huldufreyjur Dalrúnar
Líf og starf 30. september 2022

Huldufreyjur Dalrúnar

Sagnfræðingurinn Dalrún Kaldakvísl Eygerðardóttir útskrifaðist með doktorspr...

Íslensk matarveisla úr lífrænum hráefnum
Líf og starf 29. september 2022

Íslensk matarveisla úr lífrænum hráefnum

Fyrsti lífræni dagurinn var haldinn sunnudaginn 18. september á Neðra-Hálsi i...

Allur húsakostur hitaður upp með afurð úr eigin skógi
Líf og starf 28. september 2022

Allur húsakostur hitaður upp með afurð úr eigin skógi

Þessa dagana eru merk tímamót í orkuskiptum hjá bændum að eiga sér stað í ...

Saumaskapur unninn með nál hafinn til vegs og virðingar
Líf og starf 28. september 2022

Saumaskapur unninn með nál hafinn til vegs og virðingar

Margt verður til í kvenna höndum er nafn á sýningu í félagsheimilinu Goðal...

Land Rover með leikaraferil
Líf og starf 28. september 2022

Land Rover með leikaraferil

Á Hvammi í Hvítársíðu er Land Rover jeppi sem hefur öðlast frægð á síðus...

Augnablik í lífi þeirra yngstu þetta sumarið
Líf og starf 27. september 2022

Augnablik í lífi þeirra yngstu þetta sumarið

Ungviðið leikur við hvern sinn fingur yfir sumartímann enda svo margt skemmtile...

Ungir bændur taka við keflinu á Brúsastöðum
Líf og starf 27. september 2022

Ungir bændur taka við keflinu á Brúsastöðum

Skafti Vignisson og Lisa Inga Hälterlein tóku um síðustu áramót við búinu ...

Ómar Ragnarsson heiðraður
Líf og starf 27. september 2022

Ómar Ragnarsson heiðraður

Ómar Ragnarsson umhverfisverndarsinni hlaut Náttúruverndarviðurkenningu Sigri...