Enniskot
Þóra er fædd og uppalin í Enniskoti. Hún hefur alltaf haft mikinn áhuga og haft gaman af því að sinna búverkum. Eggert er fæddur á Akureyri en uppalinn á Laugum í Reykjadal. Hann var mikið í sveit þegar hann var krakki og í vinnumennsku þegar hann varð eldri. Þóra og Eggert fluttu árið 2015 í Enniskot og tóku svo við búinu af föður Þóru 2018.
Býli: Enniskot.
Staðsett í sveit: Víðidal í Húnaþingi vestra.
Ábúendur: Þóra Björg Kristmundsdóttir og Eggert Örn Kristjánsson.
Fjölskyldustærð (og gæludýra): Þrír synir, Helgi Freyr, 10 ára, Kristján Ingi, 4 ára, Arnar Friðrik, 1 árs, 3 hundar, Bessi, Tryggur og Týr.
Stærð jarðar? Jörðin er um 290 ha og þar af rúmir 60 ræktaðir.
Gerð bús? Blandaður búskapur og smá verktaka.
Fjöldi búfjár og tegundir? 140 nautgripir, holdakýr og kálfar, 115 kindur, 24 hross og 16 endur.
Hvernig gengur hefðbundinn vinnudagur fyrir sig á bænum?
Við erum bæði í skólaakstri á veturna, svo við byrjum nú flesta daga á því að koma börnunum í skólann. Þegar það er búið þá er kannski fengið sér einn kaffibolli og einhverja næringu áður en við förum að líta eftir dýrunum.
Skemmtilegustu/leiðinlegustu bústörfin? Það er nú misjafnt hvað okkur finnst skemmtilegast. Þóru finnst skemmtilegast að velja sér ásetninga og sauðburðurinn en Eggert finnst nú best að vera bara í traktornum.
Leiðinlegast, það er sennilega að moka út úr andakofanum.
Hvernig sjáið þið búskapinn fyrir ykkur á jörðinni eftir fimm ár? Kannski svipaðan dýrafjölda, bara með enn betri aðstöðu.
Hvar teljið þið að helstu tækifærin séu í framleiðslu íslenskra búvara? Við teljum að það séu mikil tækifæri í aukningu á nautakjötsframleiðslu með kynbótum á holdastofninum.
Hvað er alltaf til í ísskápnum? Mjólk, ostur, smjör og haframjólk.
Hver er vinsælasti maturinn á heimilinu? Gamla góða lambalærið með brúnni sósu, sultu, kartöflum og baunum.
Eftirminnilegasta atvikið við bústörfin? Þegar miðjuguttinn okkar stakk af rétt rúmlega eins árs (var farinn að labba 10 mánaða og hlaupa 12 mánaða) eftir að hafa verið með okkur úti að brasa. Svo tökum við eftir því að hann er ekki með okkur og allir fá sjokk og fara að leita! Við leitum og köllum á hann en ekkert svar og allir orðnir mjög stressaðir. Þá allt í einu fer pabbi hans að horfa hærra og sér að litli kútur er hæstánægður uppi í gömlum Zetor, sem var úti á túni, að leika sér.
