Vinsamlegast athugið að þetta efni er eldra en 1 árs.
Kia Niro EV er einn besti rafmagnsbíllinn á íslenskum markaði. Mikil akstursdrægni, fallegt útlit og praktísk stærð gerir þetta að vænlegum kosti á markaði þar sem samkeppnin er mikil.
Kia Niro EV er einn besti rafmagnsbíllinn á íslenskum markaði. Mikil akstursdrægni, fallegt útlit og praktísk stærð gerir þetta að vænlegum kosti á markaði þar sem samkeppnin er mikil.
Mynd / ÁL
Líf og starf 1. febrúar 2023

Gerir allt með sóma

Höfundur: Ástvaldur Lárusson

Að þessu sinni tók Bændablaðið til prufu hinn nýja Kia Niro EV. Forveri þessa bíls var einn af fyrstu almennilegu rafmagnsbílunum sem komu á markaðinn og hefur því notið nokkurra vinsælda, þrátt fyrir að vera ekki fríður sýnum.

Nú hafa hönnuðir Kia vandað sig sérstaklega vel og er hinn nýi Niro ekki bara praktískur og með góða drægni, heldur gullfallegur. Ólíkt því sem var fyrir nokkrum árum, þá er samkeppnin á þessum markaði orðin mjög mikil og þarf Niro að keppa við afbragðsgóða rafmagnsjepplinga eins og Nissan Ariya, Skoda Enyaq, Toyota bZ4X og ótal fleiri.

Ef á að grípa til einhverra lýsingarorða, þá er hægt að segja að þessi bíll sé mjög látlaus á að líta. Þeir sem ekki vita betur myndu líklegast ekki einu sinni taka eftir þessum bíl úti á götu. Það er vel hægt að telja það til kosts, því ekki vilja allir láta mikið bera á sér. Þeir sem vilja krydda útlitið aðeins geta pantað bílinn með öðrum lit á aftasta gluggapóstinum.

Niro fæst bæði bensín og rafmagns

Bifreiðin í þessum prufuakstri var 100% rafmagnsbíll, en Niro bílar eru líka framleiddir með bensínvél – ýmist tvinn- eða tengiltvinn. Líklegast gefur það framleiðandanum möguleika á að nýta verksmiðjuplássið betur og bjóða betra verð. Ókosturinn er hins vegar sá að gólfið í bílnum er ekki alveg flatt, eins og í bílum sem hannaðir eru frá grunni sem rafmagnsbílar og ekkert annað. Sérstakan gólfhalla má m.a. finna í fótarými við framsætin og í skottinu. Fyrrnefnda atriðið getur flækst fyrir ökumönnum í stórum skóm, á meðan það síðarnefnda má leysa með þili sem hækkar skottgólfið.

Innrarýmið er að miklu leyti í stíl við þemað að utan – smekklegt og tilgerðarlaust. Hér er ekkert sem kemur á óvart, heldur er allt sem hægt er að vænta af nýjum bíl til staðar og auðfundið. Í mörgum bílum hefur tökkum verið fórnað í þágu naumhyggju, og öllu stjórnað í gegnum snertiskjá – sem krefst oft fullmikillar fyrirhafnar. Í Kia Niro EV er helstu tækjum stjórnað með klassískum hnöppum, eins og miðstöð, útvarpi, sætis- og stýrishitara og hefur náðst gott jafnvægi milli notkunar takka og snertiskjás. Allt virðist vera vel skrúfað saman og úr góðum efnum. Þegar kemur að því að nota margmiðlunarskjáinn, þá virkar hann almennt vel. Boðið er upp á Android Auto og Apple CarPlay. Þeir sem vilja nýta sér þá möguleika þurfa að muna eftir snúru í símann – því tengingin er ekki þráðlaus.

Ekki eru allar skipanir í snertiskjánum og því fljótlegt að hækka í útvarpinu og kveikja á sætishitaranum. Mikið fóta- og höfuðpláss gerir flestum ökumönnum kleift að koma sér vel fyrir. Einkennilegur halli á gólfinu gerir notkun fótstiga í stórum skóm klunnalega.

Þessi bíll var útbúinn með rafmagni í sætum, sem eru nokkuð þægileg og var áklæðið úr mjúku leðri. Þar sem Kia Niro er jepplingur, þá mun mörgum finnast aðgengið í bílinn auðveldara en almennt í fólksbílum, þar sem sætin eru nokkuð hátt frá götunni. Framsætin eru rúmgóð og munu hávaxnir ökumenn komast vel fyrir. Aftursætin eru með mjög gott fótapláss, en höfuðrýmið þar lægra en æskilegt er fyrir fullorðna.

Aftursætin eru rúmgóð. Höfuðplássið mætti vera meira.

Ljúfur í akstri

Akstursupplifunin er heilt yfir mjög fyrirsjáanleg og er erfitt að benda á vankanta. Bíllinn er hljóðlátur og þegar kveikt er á akstursaðstoð, eins og sjálfvirkum hraðastilli og akreinaaðstoð, er álagið á ökumanninn í algjöru lágmarki. Aflið er gott – hann er fljótur að komast upp í þjóðvegahraða, en hröðunin er ekki þannig að maður fái fiðring í magann.

Samkvæmt framleiðandanum á rafhlaðan að skila akstursdrægni upp á 460 kílómetra. Eins og alltaf ber að taka þessum tölum með fyrirvara og draga frá 50-100 kílómetra við eðlilegar aðstæður – og jafnvel meira í miklu frosti. Auðvelt er hins vegar að fullyrða að akstursdrægnin sé ríkuleg fyrir hinn almenna notanda og munu þeir ekki þjást af drægnikvíða.

Þrátt fyrir að Kia Niro sé markaðssettur sem jepplingur, þá er hann einungis framhjóladrifinn og alls enginn jeppi. Í þessum prufuakstri gafst smá tækifæri til að reyna á eiginleika bílsins í ófærð og sást strax að litlir skaflar geta reynst mikil fyrirstaða.

Samkvæmt framleiðanda á akstursdrægnin að vera 460 km á einni hleðslu. Þó þeim tölum beri að taka með fyrirvara ættu flestir ökumenn að vera lausir við drægnikvíða í almennum akstri.

Tölur

Grunnverð Kia Niro EV Urban er 6.990.777 krónur, en bíllinn í þessum prufuakstri var af gerðinni Kia Niro EV Style og er verðið á þeim bíl 7.490.777 krónur.

Helstu mál eru: lengd 4.420 mm; breidd 1.825; hæð 1.570.

Þyngd er frá 1.682 kg, en heildarþyngd með farmi og farþegum 2.200 kg. Rafhlaðan er 64.8 kWst og getur tekið allt að 100 kW hraðhleðslu.

Afl mótors er 150 kW (204 hö).

Í stuttu máli

Kia Niro EV gerir allt sem hægt er að væntast til af honum með sóma og á samkeppnishæfu verði.

Skylt efni: prufuakstur

Auðugri framtíðarsýn Dalabyggðar
Líf og starf 1. mars 2024

Auðugri framtíðarsýn Dalabyggðar

Eins og áður hefur verið kynnt hafa alls 14 byggðarlög hérlendis tekið þátt í ve...

Fagleg og fræðandi afmælissýning
Líf og starf 26. febrúar 2024

Fagleg og fræðandi afmælissýning

Hálfrar aldar afmæli Félags tamningamanna var haldið hátíðlegt þann 17. febrúar ...

Bændur ræddu málin í borginni
Líf og starf 26. febrúar 2024

Bændur ræddu málin í borginni

Hátt í tvö hundruð bændur voru saman komnir á Hilton Reykjavík Nordica þann 12. ...

Stjörnuspá 22. febrúar - 7. mars
Líf og starf 22. febrúar 2024

Stjörnuspá 22. febrúar - 7. mars

Vatnsberinn tekur nú fyrstu skref í því sem mun hafa afar mikil áhrif á líf hans...

Teista
Líf og starf 21. febrúar 2024

Teista

Teista er meðalstór svartfugl sem finnst víða meðfram ströndinni allt árið um kr...

Stjörnuspá 8. febrúar - 22. febrúar
Líf og starf 20. febrúar 2024

Stjörnuspá 8. febrúar - 22. febrúar

Vatnsberinn er óvenju bjartsýnn á komandi vikur og hefur í kollinum hugmyndir að...

Hvanneyrar-pistlar
Líf og starf 19. febrúar 2024

Hvanneyrar-pistlar

Hvanneyri í Borgarfirði er vel þekktur skólastaður. Að stofni til byggðarhverfi ...

Hrútspungar og heimagerð BBQ-sósa
Líf og starf 16. febrúar 2024

Hrútspungar og heimagerð BBQ-sósa

Einn af meginþáttum þorra er neysla hefðbundinna íslenskra matvæla sem kallast þ...