Bænder

Fyrir um tveimur árum birtist einhvers konar stefnumótasíða hér í Bændablaðinu sem kitlaði landsmenn á stöðum sem þá óraði ekki fyrir.

Færri komust að en vildu í hóp þeirra útvöldu, en fiðringur fór um landið þegar við hófum úthringingar fyrir efnið. Eftir að blaðið fór í dreifingu var eins og við manninn mælt að ákafur skjálfti hríslaðist um landsmenn.

Fjölmiðlar gripu efnið, bæði útvarp og blöð, og vakti það mikla lukku. Til viðbótar fengu starfsmenn Bændablaðsins sendar ýmiss konar fyrirspurnir en mikill áhugi var fyrir að fá að komast að í næsta Bænder.

Einnig má bæta því við að Bænder var næstmest lesna grein Bændablaðsins árið 2024, í fyrsta sæti stóð Réttarlistinn.

Nú er komið að því, kæru landsmenn, næsti Bænder birtist í júlíblaðinu fyrir sumarfrí. Því er um að gera að hafa samband og vera með – eða mæla með vinum eða vandamönnum sem eru komnir með nóg af því að vera einhleypir.

Okkur þykir vænst um að fá að heyra frá fólki sem víðast yfir landið þannig nú skal ekki hika!

Vinsamlegast sendið póst á netfangið sigrunpeturs[hjá]bondi.is með helstu upplýsingum, mynd, auk óska um hvaða kosti maki þarf að bera – eða einfaldlega símanúmer og upplýsingar um þann sem ykkur líst á að gæti notið góðs af þessu uppátæki.