Vinsamlegast athugið að þetta efni er eldra en 8 ára.
Fengur frá Krossi, en eigandi hans lýsir eftir honum.
Fengur frá Krossi, en eigandi hans lýsir eftir honum.
Fréttir 29. júní 2015

Hrossum haldið frá eigandanum

Höfundur: smh
Fremur óvenjuleg smáauglýsing birtist í síðasta Bændablaði. Þar auglýsir Elín S. Kristinsdóttir eftir sjö  hrossum.
 
Í stuttu máli eru málavextir þeir að eftir sambúðarslit Elínar í lok árs 2009 reis deila um eignarhald á níu hrossum sem hún og fyrrverandi sambýlismaður höfðu keypt og voru í umsjá þeirra á sambúðarárunum. Hrossin voru ýmist í hesthúsum í Kópavogi eða í hagagöngu í Borgarfirði. Fyrrverandi sambýlismaður Elínar taldi sig vera einn eigandi hrossanna við sambúðarslitin  en þau hafði hann skráð á sitt nafn í WorldFeng, sem er skýrsluhaldskerfi hrossaræktenda.  Elín vildi ekki við það una og höfðaði almennt einkamál á hendur fyrrverandi sambýlismanni til viðurkenningar á eignarrétti sínum í níu tilgreindum hrossum. 
 
Eftir glímu fyrir dómstólum í kjölfarið úrskurðaði héraðsdómur að tiltekin níu hross væru sameign Elínar og fyrrverandi sambýlismannsins í jöfnum hlutföllum. Úrskurð héraðsdóms kærði sambýlismaðurinn fyrrverandi til Hæstaréttar og hann staðfesti hann með dómi þann 10. september 2014 (mál nr. 472/2014).
 
Að sögn Elínar var haldinn skiptafundur eftir að niðurstaða  Hæstaréttar lá fyrir en á þeim fundi neitaði fyrrverandi sambýlismaðurinn að una dómi og upplýsa um hvar hrossin væru. Hann hefði sótt hrossin níu, sem deilt hefur verið um, í Borgarfjörðinn og í Biskupstungur árin 2010 og 2011. Tvö hross hefur hún endurheimt nú í ár og auglýsti því eftir sjö.
 
„Félag sem ég er í forsvari fyrir hafði eignast fjárkröfu á hendur manninum vegna ógreidds málskostnaðar. Félagið gerði því fjárnám í eignarhluta hans í hrossunum og krafðist í framhaldinu nauðungarsölu. Í kjölfarið var helmingseignarhlutur í þessum níu hrossum boðinn upp hjá Sýslumanninum í Reykjavík þann 25. nóvember 2014 og var ég þar hæstbjóðandi og fékk útgefið afsal. Í dag er því eignarhlutur minn í hrossunum hundrað prósent. Þar sem hrossin voru ekki á uppboðsstað voru þeir boðnir upp samkvæmt örmerkingu og skráningu í WorldFeng.
 
Þar sem ekkert hefur enn spurst til hrossanna var úr vöndu að ráða og varð úr að senda inn kæru til auðgunarbrotadeildar Lögreglustjórans á höfuð­borgarsvæðinu, þar sem hin kærðu eru fyrrverandi sambýlismaður og samverkafólk hans. Kæran lýtur að því að halda með ólögmætum hætti  hesta sem eru í minni eign og neita að afhenda þá eða upplýsa hvar þeir eru. 
 
Í kærunni kemur fram það mat að kærði hafi með háttsemi sinni brotið gegn ákvæðum almennra hegningarlaga nr. 19/1940, einkum ákvæðum um fjárdrátt. Þá hafi samverkafólk hans gerst brotlegt við ákvæði sömu laga um hlutdeild eða eftir atvikum hylmingu. Þau hafa öll verið yfirheyrð hjá lögreglu og hefur kæran verið send til lögfræðideildar Lögreglustjórans (saksóknara). Nú er stóra spurningin hvort gefin verður út opinber ákæra á hendur þessu fólki,“ segir Elín.
 
Hefur fundið tvo af níu
 
Elín hefur fundið tvo hesta og auglýsti því eftir hinum sjö eins og áður er fram komið, þeim Feng frá Krossi, brúnum vottar fyrir stjörnu, (skráningarnúmer (sn.) IS2000135760), Funa frá Krossi, jörpum, sn. IS2000135761, Freyju frá Krossi, rauðri tvístjörnóttri, sn.  IS2001235760, Fold frá Krossi, jarpri,  sn. IS2003235761, Freistingu frá Krossi,  brúnni, sn. IS2003235762, Fífu frá Krossi, jarpri með stjörnu sn.  IS2003235763 og Svöl frá Skarði 1, móvindóttri, sn. IS2003235761.
 
Að sögn Elínar er lítið vitað um afdrif hrossanna. Hún segist þó hafa vitað til þess að hluti hrossanna hafi verið í hesthúsum í Mosfellsbæ á svæði Harðar, í Hlíðarþúfum í Hafnarfirði og á Álftanesi (Breiðabólstað). Tvö hross; jarpi hesturinn og móvindótta hryssan, hafi verið í þjálfun í hesthúsahverfinu á Selfossi líklegast 2013 eða 2014. Einnig er vitað að einhver þeirra hafa verið í hagagöngu við Stokkseyri og Eyrarbakka, við Vífilsstaði í Garðabæ, líklegast 2012, í Gaulverjabæ, í Mýrdal, Biskupstungum, Borgarfirði og hugsanlega Mosfellsdal, Rangárvallasýslu, Grindavík og Skagafirði. 
 
Hún segir að fleiri staðir geti komið til greina. Vitað sé að eitthvað af hrossunum hafi verið notuð í hestaferðir út á land á vegum danskrar konu sem auglýsir hestaferðir á Fésbók. 

3 myndir:

Nýir liðsmenn Bændablaðsins
Fréttir 21. júní 2024

Nýir liðsmenn Bændablaðsins

Lesendur hafa kannski tekið eftir nýjum efnisþáttum í blaðinu í vor. Hugarleikfi...

Opnað fyrir milljarða króna fjármögnun
Fréttir 21. júní 2024

Opnað fyrir milljarða króna fjármögnun

Lítil og meðalstór fyrirtæki á Íslandi fá aðgengi að 3,2 milljarða króna fjármög...

Stækka ræktarland og fjölga vörutegundum
Fréttir 20. júní 2024

Stækka ræktarland og fjölga vörutegundum

Hvítlauksbændurnir í Neðri-Brekku í Dölum fengu nýlega tvo styrki úr Matvælasjóð...

Verðlaunuðu góðan árangur
Fréttir 20. júní 2024

Verðlaunuðu góðan árangur

Tabea Elisabeth Schneider hlaut verðlaun fyrir besta árangur á B.S. prófi þegar ...

Fuglum fækkar vegna óveðurs
Fréttir 20. júní 2024

Fuglum fækkar vegna óveðurs

Samkvæmt fuglatalningu varð algjört hrun í fjölda fugla á Norðausturlandi þegar ...

Óhrædd að takast á við áskoranir
Fréttir 19. júní 2024

Óhrædd að takast á við áskoranir

Tilkynnt var um ráðningu Margrétar Ágústu Sigurðardóttur í starf framkvæmdastjór...

Halla færir út kvíarnar
Fréttir 19. júní 2024

Halla færir út kvíarnar

Halla Sif Svansdóttir Hölludóttir, garðyrkjuframleiðandi og eigandi garðyrkjustö...

Sala Búvís stöðvuð
Fréttir 19. júní 2024

Sala Búvís stöðvuð

Samkeppniseftirlitið hefur komið í veg fyrir að Skeljungur kaupi Búvís ehf. þar ...