Hestamennska í höndum kvenna á Vopnafirði

Frá landnámstíð hefur hesturinn skipt miklu máli á Íslandi sem samgöngutæki og vinnudýr. Hesturinn og hestamennska var þá aðallega í höndum karlmanna þótt konur færu á bak þegar þær þurftu að fara milli bæja, til kirkju eða á milli landshluta. Margt hefur breyst á Íslandi síðan þá, ekki síst hestamennskan. 

Íslenski hesturinn er ekki lengur notaður sem vinnudýr og sjaldan til að fara á milli bæja eða landshluta nema um skipulagðar hestaferðir sé að ræða. 

 

Á Vopnafirði hefur hestamennska aukist undanfarin ár síðan hestamannafélagið Glófaxi var endurlífgað fyrir rúmum 15 árum. Eftir að Berglind Sigurðardóttir flutti í Refstað frá Ólafsfirði fyrir nokkrum árum, hefur heldur betur færst líf í félagsstarfið hjá Glófaxa.  Reiðnámskeið fyrir börn og fullorðna eru haldin árlega á félagssvæðinu á Skálanesi rétt innan við þorpið. Á Refstað var gömlu refahúsi breytt í glæsilegt hesthús og komið upp kaffistofu og snyrtingu.  Hross eru tekin á hús rétt eftir áramótin og konur á staðnum, úr þorpinu og erlendis frá byrja að temja, þjálfa og ríða út. Farið er í kvennareið nokkrum sinnum á ári og  karlareið einu sinni til tvisvar.  Jónsmessureið og bæjareið eru fastir viðburðir en í bæjareið er riðið á milli bæja í sveitinni og jafnvel í önnur byggðarlög. Þessi reið er gjarna farin seinni part sumars og fá hrossin þar góða þjálfun fyrir göngur haustsins.

 

 Síðustu ár hefur „kvennareið“ orðið sífellt vinsælli hjá konum á staðnum, en hún er eitt af því fjölmörgu sem Berglind hefur innleitt í félaginu.

 

Föstudaginn 29. apríl var svo farið í fyrstu kvennareið ársins. Þrátt fyrir snjó og kulda voru 12 konur mættar og lagt var af stað í vel skipulagðan reiðtúr í kringum Refstað með bjórstoppi á leiðinni. Á meðan var formaður Glófaxa, Halldór Jónasson, ásamt grillmeistara frá Sláturhúsi Vopnfirðinga, Sören Jeppesen, að sjá um að kvöldverðurinn væri tilbúinn þegar hópurinn kæmi til baka. Hesthúsið og hnakkageymslan breyttist í veislustofu, nokkrar konur úr þorpinu og nágrannar bættust við og stemningin var þveröfug við veðurfarið úti – hlý og skemmtileg. 

 

Hópurinn hjá Glófaxa á Vopnafirði í kvennareið 29. apríl. 

 

Karlar eru að sjálfsögðu líka velkomnir í „kvennareið“ segir Berglind, þeir verða bara að virða að þetta er fyrir konur og koma þannig búnir, til  dæmis með varalit, í pilsi og með sítt hár. Hingað til hefur enginn af körlunum sem stunda hestamennsku á Vopnafirði haft tíma eða kjark til að taka þátt  en það kemur kannski með hækkandi sól.