Frjálsi lífeyrissjóðurinn og Lífeyrissjóður bænda sameinast

Stjórnir Frjálsa lífeyrissjóðsins og Lífeyrissjóðs bænda hafa undirritað samning um sameiningu lífeyrissjóðanna. Í fréttatilkynningu segir að markmið sameiningarinnar sé að nýta stærðarhagkvæmni til að lækka rekstrarkostnað, efla þjónustu og upplýsingagjöf til sjóðsfélaga og launagreiðenda, minnka rekstraráhættu og um leið styrkja eigna- og áhættustýringu sjóðanna.

Með sameiningunni muni Frjálsi taka yfir öll réttindi og skyldur gagnvart sjóðsfélögum Lífeyrissjóðs bænda en fyrst um sinn verði haldið utan um áunnin réttindi sjóðsfélaga Lífeyrissjóðs bænda í lokaðri tryggingadeild. Viðræður um sameiningu sjóðanna hófust að hausti 2025. „Með sameiningunni verða sjóðfélagar Lífeyrissjóðs bænda hluti af öflugum sjóðfélagahópi Frjálsa og mun sameinaður sjóður þjónusta rúmlega 85 þúsund sjóðfélaga. Við munum áfram leggja ríka áherslu á góða og persónulega þjónustu. Sameiningin leggur traustan grunn að öflugri framtíð með hagsmuni allra sjóðfélaga að leiðarljósi," segir Ágústa Eva, stjórnarformaður Frjálsa.

Lagt fram til samþykktar í júní

Sameiningin er háð samþykki Samkeppniseftirlitsins og staðfestingu fjármála og efnahagsráðurneytisins á breytingum á samþykktum sjóðanna. Einnig verður sameiningin lögð fram til staðfestingar á ársfundi Lífeyrsisjóðs bænda þann 4. júní klukkan 20 á Hótel Stracta á Hellu og þann 5. júní klukkan 20 í útibúi Arion banka á Akureyri.

„Það eru ríkir hagsmunir fyrir Lífeyrissjóð bænda að sameinast stórum sjóði eins og Frjálsa sem er jafnframt með öflugan rekstrar- og eignastýringaraðila, Arion banka, sem veitir sjóðfélögum góða þjónustu. Við í stjórn Lífeyrissjóðs bænda bindum vonir til þess að sameiningin leggist vel í sjóðfélaga og að þeir staðfesti hana á ársfundi í júní. Stjórn telur jafnframt að með sameiningu sjóðanna verði lagður traustur grunnur að áframhaldandi uppbyggingu öflugs lífeyrissjóðs,“ segir Vala Valtýsdóttir, stjórnarformaður Lífeyrissjóðs bænda.

Heildareignir sameinaðs sjóðs eru um 672 milljarðar króna miðað við stöðu eigna 30. apríl. Þar af eru eignir Frjálsa um 626 milljarðar og eiginir Lífeyrissjóðs bænda um 46 milljarðar.