Bændur bíða eftir útspili landbúnaðarráðherra

Umræðufundur sauðfjárbænda á Austurlandi var haldinn í gær í Félagsheimilinu Arnhólsstöðum í Skriðdal. Það var þröngt setinn bekkurinn en um 150 sauðfjárbændur og gestir þeirra ræddu um þá stöðu sem uppi er í sauðfjárræktinni um þessar mundir. 

 

Unnsteinn Snorri Snorrason, framkvæmdarstjóri LS, og Einar Ófeigur Björnsson, stjórnarmaður í BÍ, héldu framsögu og fóru yfir þau úrræði sem hafa verið rædd við ríkisvaldið. Ágúst Torfi Hauksson, framkvæmdarstjóri Norðlenska, Skúli Þórðarson, framkvæmdarstjóri Sláturfélags Vopnfirðinga, og Ingvar Gíslason, markaðsstjóri Norðlenska, fóru yfir mál frá sínum bæjardyrum og svöruðu spurningum sem þeim höfðu verið sendar fyrir fundinn. Fulltrúum frá Kaupfélagi Skagfirðinga var boðið til fundarins en voru fjarverandi. 

 

Að sögn Guðfinnu Hörpu Árnadóttur, formanns Félags sauðfjárbænda á Héraði og fjörðum, gekk fundurinn vel og var upplýsandi. „Boðaðar afurðaverðslækkanir hafa þau áhrif að úr dreifðum byggðum Austurlands fara yfir 200 milljónir króna og hafa þær bein áhrif á yfir 180 fjölskyldur í fjórðungnum. Afleidd áhrif á aðrar greinar landbúnaðarins og tengd störf eru þar ótalin,“ sagði Guðfinna í Facebookfærslu eftir fundinn og í samtali við Bændablaðið sagði hún hljóðið þungt í fólki.

 

„Fulltrúar bænda fóru vel yfir málin og hvernig viðræður við ríkisvaldið hafa þróast. Það má segja að menn bíði núna eftir útspili ráðherra,“ sagði hún. Líflegar umræður sköpuðust um markaðssetningu afurðanna og þar viðurkenndu menn að mætti alltaf gera betur. Að sögn Guðfinnu kom ekki fram í máli forsvarsmanna sláturhúsanna að verðskrár myndu breytast frá því sem nú er. Samningar við kaupendur færu fram núna í haust og það væri í fyrsta lagi þá að menn sæju hvort hægt væri að greiða bændum hærra verð fyrir afurðirnar.

Fleiri fundir fram undan
Sauðfjárbændur funda víða þessa dagana. Búnaðarsamband Húnaþings og Stranda og Félag sauðfjárbænda í Skagafirði boða til fundar í kvöld, miðvikudaginn 30. ágúst, á Bönduósi. Fundurinn verður haldinn í Félagsheimilinu á Blönduósi og hefst klukkan 20:00. Þar verða með framsögu Ágúst Andrésson, formaður Landssamtaka sláturleyfishafa, Oddný Steina Valsdóttir, bóndi og formaður Landssamtaka sauðfjárbænda og Sigríður Ólafsdóttir, bóndi og ráðunautur á rekstrarsviði RML.

Þá hefur stjórn Félags sauðfjárbænda í Vestur-Skaftafellssýslu boðað til almenns félagafundar í félagsheimilinu Tunguseli fimmtudaginn 31. ágúst kl. 14:00. 
 

Unnsteinn Snorri Snorrason, framkvæmdastjóri LS, fór yfir tillögur sem ræddar hafa verið við ríkisvaldið. 
 

Fjölmenni var á fundinum á Arnhólsstöðum. Myndir / Guðfinna Harpa Árnadóttir.