Saumum nú jólaskraut

Í stjórn Íslenska bútasaums- félagsins sitja nokkrar mætar konur, en ein þeirra, Sigrún Ingibjörg Sveinbjörnsdóttir, er farin að huga að jólunum.

„Þegar líður á árið er alltaf gaman að föndra eitthvað hátíðlegt til skreytinga heima við eða mögulega nota sem pakkaskraut,“ segir Sigrún. Hún bætir við að upplagt sé að spreyta sig á meðfylgjandi uppskrift enda saumaskapurinn þar bæði skemmtilegur og auðveldur, enda sé bæði hægt að sauma í vél og í höndunum.
Áhugasamir lesendur geta nú sest við sauma, og muna að hafa eftirfarandi við höndina: Fallegt efni, td. úr bómull eða filti, troð, tvinna/útsaumsgarn, skæri, nál eða saumavél, nú og svo perlur/pallíettur eða annað sem má sauma á til skreytinga.
En gefum Sigrúnu orðið:

„Byrjið á að klippa út efnið sem á að nota í verkið. Næst að sauma jólatréð saman. Ef það er gert í saumavél er best að klippa sniðið aðeins stærra en áætlað er, því það er saumað saman á röngunni og svo snúið við. Þeir sem sauma í höndunum gera það hins vegar á réttunni með tvinna eða útsaumsgarni.

Fyllið tréð léttilega með smá troði og fyrir þá sem vilja er gaman að skreyta það með perlum eða pallíettum. Skiljið eftir op neðst á trénu fyrir trjástofninn.

Stofninn má í stað efnis, vera úr einhverju öðru, hvort sem það er tréstubbur eða kanilstöng. Saumið fótinn á tréð og/eða festið með lími.

Eins er farið að með trukkinn, saumað er með vél eða í höndunum. Ef saumavél er notuð í verkið er gott að hafa opið (fyrir troðið) ofan á pallinum til þess að hægt sé að festa tréð þar við. Setjið smá troð í bílinn. Ekki gleyma að setja band í þakið á bílnum til að geta hengt hann upp.

Þegar bíllinn er kominn saman eru dekkin fest báðum megin með þræði- spori, eða hvernig sem hentar best.

Næst eru gluggastykkið og ljósið fest á sama hátt og síðast eru útlínur saumaðar á bílinn, með aftursting eins og sýnt er á myndinni
Einnig getur verið gaman að gera sína eigin útfærslu af bílnum og þá má t.d. kíkja í töluboxin, hvort leynist þar gamlar tölur sem hægt er að nota sem dekk eða ljós.