Fjörið í Skagafirði
Út er komin bókin Skagfirskar skemmtisögur 6 – Fjörið heldur áfram! Þetta er sjötta útgáfan á safni skemmtisagna úr Skagafirði sem Björn Jóhann Björnsson blaðamaður tók saman.
Fyrstu fimm bækurnar komu út á árunum 2011- 2016. Bókaútgáfan Hólar gefur út, líkt og áður.
Sjötta bókin hefur að geyma yfir 200 gamansögur, úr nútíð og fortíð, en alls hafa komist á prent um 1.300 sögur og gamanvísur.
Að þessu sinni bregður fyrir gamalkunnum sem nýjum sögupersónum. Fyrstan skal nefna kaupmanninn Bjarna Har, heiðursborgara Skagafjarðar, sem féll frá í byrjun þessa árs, á 92. aldursári. Um Bjarna hafa verið sagðar margar skemmtilegar sögur og hér bætast við nokkrar í viðbót, m.a. saga af því þegar hann kom þýskum ferðamönnum í opna skjöldu og útvegaði þeim umbeðnar postulínskúlur úr raflínustaurum. Þeir áttu ekki von á að kaupmaðurinn ætti slíkan varning, enda vildu Þjóðverjarnir aðeins láta reyna á þá umsögn um verslun Bjarna Har að þar fengist allt milli himins og jarðar.
Þá eru í bókinni nokkrar sögur af sr. Baldri Vilhelmssyni, sem þjónaði í Vatnsfirði við Ísafjarðardjúp til fjölda ára. Margar snjallar sögur hafa verið ritaðar og sagðar um Baldur en færri vita að hann var borinn og barnfæddur Hofsósingur. Fleiri kunnir kappar koma við sögu, eins og Ýtu-Keli, Dúddi á Skörðugili, Hvati á Stöðinni, Halli í Enni og fleiri og fleiri. Lokakafli bókarinnar er með sögum af Sigurði Jónssyni, kennara á Sauðárkróki, sem flestar eru sagðar af honum sjálfur. Grátbroslegar sögur, eins og þegar hann gekk í flasið á meðlimum Rolling Stones er þeir voru á tónleikaferð í Skotlandi, og gat hann
fundið af þeim rakspírailminn!
Skagfirskar skemmtisögur 6 fást í bókabúðum og stórmörkuðum um land allt, en hægt að leggja inn
pantanir hjá Bókaútgáfunni Hólum.
