Þáttaskil þurfi í loftslagsaðgerðum Íslendinga
Loftslagsráð segir að nú þurfi að verða þáttaskil í framkvæmd loftslagsaðgerða og telur nýuppfærða Aðgerðaáætlun í loftslagsmálum ófullnægjandi.
Loftslagsráð birti álit sitt á endurskoðaðri Aðgerðaáætlun í loftslagsmálum í öndverðum nóvembermánuði. Niðurstaða Loftslagsráðs er sú að nú þurfi að verða þáttaskil í framkvæmd loftslagsaðgerða. „Þrátt fyrir endurskoðun er aðgerðaáætlun í loftslagsmálum ómarkviss. Skerpa þarf heildarstefnuna, samþætta ólíkar aðgerðir og samhæfa framkvæmdina við stefnumið í orku-, samgöngu-, matvæla- og ríkisfjármálum. Framkvæmd áætlunarinnar er ekki áfangaskipt með skýrum hætti, ábyrgð er oft óljós og margar aðgerðir ófjármagnaðar. Þessir veikleikar munu tefja framkvæmd, forgangsröðun og ráðstöfun fjármuna. Fjöldi aðgerða sem beinast að stórum uppsprettum losunar, svo sem frá sjávarútvegi og landbúnaði, eru enn óútfærðar sex árum eftir að fyrsta útgáfa áætlunarinnar var kynnt,“ segir í álitinu.
Þegar sjáanleg áhrif á Íslandi
Segir Loftslagsráð að stefni í að árið 2024 verði heitasta ár frá upphafi mælinga. Sú röskun á loftslagi af mannavöldum sem þessu valdi hafi þegar aukið tíðni og umfang hamfara um heim allan með umtalsverðu eigna- og manntjóni.
Mikið sé í húfi fyrir Ísland að samstarf ríkja í baráttunni við loftslagsvandann skili árangri hratt og örugglega. „Eins og nýleg skýrsla Vísindanefndar um loftslagsbreytingar staðfestir þá eru þegar komin fram umtalsverð áhrif á náttúru Íslands, atvinnuvegi, uppbyggða innviði og efnahag. Afleiðingar loftslagsvár utan landsteinanna munu ekki síður hafa mikil efnahags- og samfélagsleg áhrif hér heima,“ segir enn fremur í álitinu.
Alvarleg mistök
Formaður Loftslagsráðs, Halldór Þorgeirsson, hefur sagt framkvæmd loftslagsaðgerða afar veika hérlendis og nefnt sem dæmi að viðsnúningur stjórnvalda í hvatakerfum hreinorkubíla á síðasti ári hafi verið alvarleg mistök sem sendi kolröng skilaboð til fólks.
Loftslagsráð fjallar skv. lagaskyldu um uppfærða aðgerðaáætlun Íslands í loftslagsmálum og birti álit sitt 8. nóvember sl.
