Vinsamlegast athugið að þetta efni er eldra en 10 ára.
Stefnt að því að hefja skyrframleiðslu á vegum MS í Bandaríkjunum á næsta ári
Fréttir 28. ágúst 2014

Stefnt að því að hefja skyrframleiðslu á vegum MS í Bandaríkjunum á næsta ári

Höfundur: Vilmundur Hansen

Reiknað er með að Mjólkursamsalan og samstarfsfyrirtæki hennar á Norðurlöndunum selji í ár um 10 þúsund tonn af skyri á markaði ytra. Hluti skyrsins er framleiddur hér, en til að þjóna þessum markaði öllum þyrfti um þriðjung íslensku mjólkurframleiðslunnar, eða um 35 milljónir lítra af mjólk. Framleiðsla á skyri undir merki MS hefst væntanlega í Bandaríkjunum á næsta ári.

Einar Sigurðsson, forstjóri Mjólkursamsölunnar, sagði í samtali við Bændablaðið að eftirspurn eftir skyri væri mun meiri á Norðurlöndunum en útflutningskvóti Evrópusambandsins frá Íslandi leyfði og meiri en framleiðslugeta íslenskra bænda leyfði.

„Megnið af skyrinu sem við flytjum út fer á markað í Finnlandi en við erum í samvinnu við fyrirtæki í Danmörku sem heitir Thise og annað í Noregi og Svíþjóð sem heitir Kavli og þau framleiða skyr með sérleyfi frá okkur.“

Framleitt með leyfi og eftirliti MS

Fyrirtækin sem um ræðir framleiða skyr undir vörumerki MS, uppskriftin er íslensk og umbúðirnar eru sams konar þeim sem notaðar eru á Íslandi en mjólkin er dönsk eða sænsk. Einar segir að fyrirtækin framleiði skyrið eftir uppskrift, gæðaeftirliti og með tækni frá MS og greiði afgjald fyrir það.

„Thise framleiðir skyr sem er selt í Danmörk og Finnlandi en Kavli hefur framleiðsluréttinn fyrir Noreg og Svíþjóð. Á þessu ári er gert ráð fyrir að heildarsalan í Skandinavíu verði um 10 þúsund tonn.“

Útflutningur til Sviss

Í september hefst dreifing og sala á skyri á vegum Mjólkursamsölunnar í Sviss.


„Sviss er utan Evrópu­sambandsins og sérstakir samningar milli ríkjanna gera þennan útflutning hagkvæman ef tekst að skapa eftirspurn á markaði. Það kemur í ljós á næstunni. Víðast hvar er skyr í flokki dýrari mjólkurafurða. Það er mjög hagkvæmt að auka skyrsölu erlendis á kostnað sölu á undanrennudufti, sem er hrávara á iðnaðarmarkaði. Við eigum umframmagn af undanrennu í landinu vegna þess hve áhugasamir Íslendingar eru um fitumeiri mjólkurafurðir. Þá fellur til prótín sem hagkvæmt er að koma í verð með þessum hætti.“

Skyrframleiðsla í Bandaríkjunum

Mjólkursamsalan flytur út um 120 tonn af skyri til Bandaríkjanna á ári en að sögn Einars er flutningsleiðin þangað erfið og ekki til þess fallin að þjóna nema litlum markaði.


„Við teljum að markaðurinn í Bandaríkjunum taki við umtalsvert meira magni en við flytjum þangað og því erum við að skoða möguleika á að gera samninga við þarlenda aðila um framleiðslu á skyri sem selt yrði undir merki MS. Við höfum einnig verið að skoða möguleika á því  hvort hluti hráefnisins gæti verið íslenskur í formi undanrennudufts.“

Einar segir að í dag sé gert ráð fyrir að Mjólkursamsalan eigi hluta í fyrirtækinu sem muni markaðssetja og selja skyrið í Bandaríkjunum.

„Fjárfestar sem koma að þessu með okkur hafa haft nokkur tengsl við Ísland í hartnær tvo áratugi í gegnum Íslenska erfðagreiningu.“

Gríðarlega stór markaður

„Bandaríkjamarkaður er gríðarlega stór; jógúrtmarkaðurinn einn og sér veltir um sjö milljörðum Bandaríkjadala á ári og brot af því er stórt fyrir okkur. MS hefur gert vinnuáætlanir um sölu í Bandaríkjunum en við höfum ekki opinberað þær tölur. Við förum af stað með ákveðna hugmynd um þann árangur sem hægt er að ná og reynum að ná þeim markmiðum með lágmarksáhættu.“

Einar gerir ráð fyrir að framleiðsla á skyri undir merki MS í Bandaríkjunum geti hafist á næsta ári ef allt gengur að óskum.

Nýr íshellir til athugunar
Fréttir 12. maí 2025

Nýr íshellir til athugunar

Sveitarstjórn Bláskógabyggðar hefur lagt fram tillögu nýs deiliskipulags sem tek...

Ný lög um Jöfnunarsjóð sveitarfélaga
Fréttir 9. maí 2025

Ný lög um Jöfnunarsjóð sveitarfélaga

Frumvarp hefur verið lagt fram á Alþingi um ný heildarlög um Jöfnunarsjóð sveita...

Háskólasamstæða mikilvæg
Fréttir 9. maí 2025

Háskólasamstæða mikilvæg

Háskóli Íslands og Háskólinn á Hólum verða samstæða frá næstu áramótum og er það...

Störfum í ferðaþjónustu fjölgar en fækkar í landbúnaði
Fréttir 9. maí 2025

Störfum í ferðaþjónustu fjölgar en fækkar í landbúnaði

Ferðaþjónusta í Fljótsdalshreppi hefur eflst mjög undanfarin ár, en landbúnaður ...

Sòl*Kol á Sólheimum og sumarið í vændum
Fréttir 8. maí 2025

Sòl*Kol á Sólheimum og sumarið í vændum

Það er viðeigandi að Sólheimar hafi orðið fyrir valinu við að halda málþing um f...

Lausnir á vandamálum í sauðburði
Fréttir 8. maí 2025

Lausnir á vandamálum í sauðburði

Í allmörg ár hefur verið venja hér í blaðinu að birta skýringarmyndir Þorsteins ...

Rýnt í Bændablaðið í bláu Adríahafinu
Fréttir 7. maí 2025

Rýnt í Bændablaðið í bláu Adríahafinu

Upp úr áramótum fréttist af manni sem lá í Bændablaðinu á Suðurskautslandinu. Nú...

Hundasoglús finnst á ref í fyrsta sinn
Fréttir 7. maí 2025

Hundasoglús finnst á ref í fyrsta sinn

Svokölluð hundasoglús hefur í fyrsta sinn fundist í feldi refs hér á landi.