Skógarbúskapur styrktur í Vestur-Húnavatnssýslu

Átaksverkefni í skógrækt í Vestur-Húnavatnssýslu var formlega sett af stað í Miðfiðri í gær að viðstöddum fulltrúum Skógræktar ríkisins, Bændasamtaka Íslands og sveitarstjórnar.

Um er að ræða eins árs átak sem felur meðal annars í sér að þróa útfærslur á nýjum skógræktarverkefnum með það að markmiði að bæta búsetuskilyrði, fjölga tækifærum fyrir bændur, auka skógarþekju og brúa bil milli skógræktar og hefðbundins landbúnaðar. Verkefnið tengist einnig skrefum íslensks landbúnaðar í átt til kolefnishlutleysis, að því er fram kemur í tilkynningu úr ráðuneytinu.

Skógrækt ríkisins stýrir verkefninu

Í verkefninu er gert ráð fyrir eftirfarandi áherslupunktum:

• skjólbeltakerfi fyrir ræktun s.s. hvers konar jarðrækt.
• skjóllundi fyrir búfé t.d. haustbeit stórgripa, sauðburðarhólf og önnur beitarhólf.
• beitarskóga í tiltölulega stórum afgirtum beitarstýrðum hólfum.
• landgræðsluskóga á illa eða ógrónu landi.
• skjólskóga með fjölbreyttum trjágróðri þar sem tekist er á við staðbundin vindakerfi með það að markmiði að draga úr eða bægja frá sterkum vindstrengjum.
• akurskógrækt á landi sem ekki nýtist til matvælaframleiðslu að svo stöddu.
• fjölnytjaskóga með einhver af ofangreindum markmiðum sem og timburnytjar.

Sigrún Magnúsdóttir, umhverfis- og auðlindaráðherra, hefur falið Skógræktinni umsjón með framkvæmd verkefnis og mun vinna með bændum að þessu verkefni, veita þeim ráðgjöf og fara yfir þá kosti sem verða í boði varðandi ofangreinda flokka skógræktar; hvernig þeir geta stutt við annan landbúnað og bætt skilyrði til búsetu. Leitað verður eftir viðhorfi bænda á svæðinu til núverandi stuðningskerfis í skógrækt; hvort og þá hverju þyrfti að breyta svo þeir sjái hag í þátttöku í því. Einnig verður leitað eftir samstarfi við hagsmunasamtök bænda.