MRSA-bakteríur greinast í svínakjöti í verslunum Asda og Sainburys
Höfundur: Vilmundur Hansen
Sýni sem nýlega voru tekin úr svínakjöti í verslunum Asda og Sainburys á Bretlandseyjum sýndu að hluti kjötsins var sýkt af sýklalyfjaónæmu afbrigði af MRSA-bakteríum sem finnst í búfé.
MRSA stendur fyrir Methicillin-resistant Staphylococcus aureus, eða Staphylococcus aureus-baktería, sem er ónæm fyrir Methicillin-sýklalyfjum. Bakterían getur valdið alvarlegum sýkingum í mönnum og talið að hún valdi dauða um 300 manns á ári á Bretlandseyjum.
Blaðamenn The Guardian, í samvinnu við Bureau of Investigative Journalism, segjast einnig hafa fundið galla í innflutningsreglugerðum Breta sem gerir kleift að flytja til landsins lifandi svín frá löndum eins og Danmörku þar sem afbrigði sömu bakteríu, sem kallast MRSA CC398, er mjög algeng.
Þrátt fyrir að MRSA-bakterían drepist sé kjötið vel eldað er mikil hætta á smiti sé það meðhöndlað hrátt. Starfsmenn svínabúa og svínasláturhúsa eru sagðir vera í mestri hættu á smiti og að vera smitberar.
Sýkta kjötið í verslunum er því einungis talið vera toppurinn á ísjakanum.
