Kokkalandsliðið fékk og gull og silfur
Kokkalandsliðið fékk gullverðlaun fyrir eftirrétti og silfur fyrir aðra kalda rétti á Ólympíuleikunum í Erfurt í Þýskalandi í gær. Keppt verður í heitum réttum á morgun.
Í viðtali við Þráin Frey Vigfússon, þjálfara Kokkalandsliðsins, á vefnum veitingageirinn.is kemur fram að árangurinn sé afrakstur 18 mánaða undirbúnings. „Þetta er frábær árangur hjá liðinu. Við höfum lagt nótt við dag að gera borðið einstakt. Síðustu 18 mánuði höfum við æft stíft fyrir keppnina og það er að skila sér með þessum árangri. Gull í eftirréttum er virkilega ánægjulegt. Í Kokkalandsliðinu er ungt fólk sem hefur náð vel saman í mjög ströngu ferli og hefur verið að leggja gríðarlega mikið á sig í undirbúningnum.”
Tilkynnt verður um heildarúrslit á miðvikudaginn næstkomandi, þegar allar þjóðir hafa lokið keppni og stigaútreikningur liggur fyrir.
Í Kokkalandsliðinu eru: Hafliði Halldórsson framkvæmdastjóri liðsins, Þráinn Freyr Vigfússon þjálfari, Bjarni Siguróli Jakobsson fyrirliði, Björn Bragi Bragason forseti KM/framkvæmdastjórn, Steinn Óskar Sigurðsson liðsstjóri, Jóhannes Steinn Jóhannsesson liðsstjóri, Fannar Vernharðsson, Ylfa Helgadóttir, Hafsteinn Ólafsson, Axel Clausen, Garðar Kári Garðarsson, Hrafnkell Sigríðarson, Atli Þór Erlendsson, Sigurður Ágústsson, Georg Arnar Halldórsson og María Shramko.