Ein umsögn um breytingar á búvörulögum
Ein umsögn barst í samráðsgátt um breytingar á búvörulögum og framlengingu búvörusamninga. Umsögnin er frá Samtökum iðnaðarins og Samtökum fyrirtækja í landbúnaði.
Samtökin fagna áformum um framlengingu búvörusamninga til 2027 og segja það rökrétt skref að veita lengri frest og rúmt svigrúm til að vinna að sameiginlegri sýn fulltrúa landbúnaðarins og stjórnvalda á starfsumhverfi og stuðningskerfi greinarinnar til framtíðar.
Núgildandi búvörusamningar voru gerðir árið 2016 til tíu ára. Samningarnir hafa verið endurskoðaðir nokkrum sinnum á því tímabili án þess að miklar breytingar hafi orðið. Síðasta endurskoðunin fór fram 2023 og þar voru samningsaðilar sammála um að hefja samtal um starfsumhverfi landbúnaðar til framtíðar. Tvær þingsályktanir er varða landbúnað til framtíðar voru samþykktar af Alþingi það ár, matvælastefna til ársins 2040 og landbúnaðarstefna til 2040.
Framlenging á gildistíma núgildandi samninga lágmarkar óvissu fyrir innlenda matvælaframleiðslu á meðan mótun nýs samnings stendur yfir. Að mati samtakanna er mikilvægt að stjórnvöld og Bændasamtök Íslands hafi nægan tíma til að vinna að vandaðri framtíðarsýn. Samtökin leggja áherslu á fyrirsjáanleika og stöðugleika sé gætt í starfsumhverfi landbúnaðarins á meðan viðræður standa yfir. „Mikilvægt er að ekki verði farið í stórvægilegar eða íþyngjandi breytingar á rekstrar- og starfsumhverfi greinarinnar til hliðar við sjálfa búvörusamningagerðina á tímabilinu. Fyrirsjáanleiki er lykilforsenda þess að samningsaðilar nái að vinna að farsælli og sameiginlegri framtíðarsýn, landsmönnum öllum til heilla“, segir í umsögninni.
