Hægt væri að knýja allan íslenska skipaflotann með repjuolíu

„Það væri auðveldlega hægt að knýja íslenska skipaflotann með vistvænni íslenskri orku, repjuolíu, sem bændur gætu ræktað í stórum stíl,“ segir Jón Bernódusson, verkfræðingur hjá Samgöngustofu.

 

„Við erum með allar kjöraðstæður fyrir slíkt verkefni. Það þarf bara að spýta í lófana og fara að taka á hlutunum, því útblástur skipa og flugvéla er mjög stór hluti þess CO2 sem nú er reynt að minnka vegna ört vaxandi hlýnunar jarðar,“ segir Jón. 

 

Hann hefur haldið fjölmarga fyrirlestra fyrir erlenda námshópa um kosti repjunnar, auk þess að gera rannsóknir á plöntunni. 

 

„Við ræktun á repju tekur hektarinn með ljóstillífun í sig 6 tonn af CO2. Við það verður til afurð sem er súrefni O2. Við brunann á olíunni sem til verður á einum hektara munu 3 tonn af CO2 fara aftur út í andrúmsloftið sem er aðeins helmingur þess magns CO2 sem binst og eyðist við ræktunina. 

 

Ef við erum að tala um repju fyrir allan íslenska fiskiskipaflotann værum við með ræktuninni að nýta tæp 500.000 tonn af CO2 úr andrúmsloftinu, þ.e. 250.000 tonn umfram það sem verður til við bruna olíunnar. Það munar um minna,“ segir Jón.

 

Jón hefur haldið fyrirlestra um kosti repjuræktunar fyrir um tvö þúsund nemendur víða að úr heiminum síðustu ár. Það hefur einnig verið sóst eftir kynningum hans og fyrirlestrum víða erlendis og þá sérstaklega í Þýskalandi. Í fyrirlestrunum er Jón fyrst og fremst að miðla hugmyndum um sjálfbæra og innlenda ræktun orkujurta til að knýja samgöngutæki.  

 

Ræktun á 150 hekturum í dag

 

Í dag er repja ræktuð á 150 hekturum hjá bændum víðs vegar um landið.„Til að knýja íslenska fiskiskipaflotann þarf 160.000 hektara sem er 40 x 40 km landsvæði. Það tekur 2 tíma að keyra í kringum það á 80 km hraða. Við myndum rækta upp sandana með lúpínu og í framhaldinu kæmi repjan, þetta er ekki flókið,“ bætir Jón við.