Útflutningur á heimilisúrgangi beint frá Akureyri

Nýlega opnaði Íslenska gámafélagið nýjar starfsstöðvar sínar á Ægisnesi 3 á Akureyri. Með opnun á þessu svæði stórbætist þjónusta við Norðurland og mun í fyrsta skipti hefjast útflutningur á almennum heimilisúrgangi beint frá Akureyri.

Úrgangurinn mun fara til endurvinnslu og orkunýtingar í Evrópu í stað urðunar á Sölvabakka. „Af þessu hlýst mikill umhverfislegur ávinningur, þar sem orkan er nýtt til kyndingar á heimilum í Evrópu. Á árinu verður einnig ný vinnslulína fyrir gler sett upp á svæðinu þar sem allt umbúðagler verður meðhöndlað og er það einnig í fyrsta skipti sem slíkt er gert á Norðurlandi,“ segir Jón Þórir Frantzson, forstjóri Íslenska gámafélagsins, og bætir við:

„Við hlökkum til að kynnast norðlenskum fyrirtækjum betur og viljum gera okkar besta til að veita framúrskarandi þjónustu í sorphirðu og úrgangsmálum á Norðurlandi. Með bættri aðstöðu okkar á Akureyri og samstilltu átaki mun okkur takast að draga mikið úr þeim umhverfisáhrifum sem urðun úrgangs hefur í för með sér.“