Fyrsti Angus-holdakálfur hjá Nautís í vor
Nýlega kom fyrsti kálfur vorsins í heiminn hjá Nautís á Stóra-Ármóti í Flóahreppi. Um er að ræða Angus nautkálf, sem hefur fengið nafnið Toppur en hann er undan norska ungnautinu Topp Xxl.
„Toppur braggast vel og er fallegur. Nautís er einangrunarstöð fyrir holdagripi af Aberdeen Angus kyni en erfðaefnið er flutt inn frá Noregi. Við höfum aðgang að besta erfðaefni Norðmanna en þeir sækja erfðaefnið um allan heim, Ástralíu, Kanda, USA, Bretland og víðar en sóttvarnarreglur eru strangar,“ segir Sveinn Sigurmundsson, framkvæmdastjóri Búnaðarsambands Suðurlands, en Nautís er rekið af sambandinu, Landssambandi kúabænda og NBÍ, sem er nautastöð Bændasamtaka Íslands.
„Stöðin var byggð 2016-2017. Fluttir voru inn fósturvísar 2017 og fæddust fyrstu gripirnir 2018. Síðan þá hafa verið seld lífdýr frá stöðinni og sæði úr Angus nautum dreift. Kálfurinn sem fæddist núna var númer 125. Nú eru 23 Angus kýr til og eru þær í kúafjósi og eru að bera þessa dagana,“ bætir Sveinn við.
