Undirskriftasöfnun til bjargar Gróðrastöðinni Mörk

Settur hefur verið í loftið undirskriftalisti til stuðnings Gróðrastöðinni Mörk og skorað á Reykjavíkurborg að falla frá áformum sínum um að hrekja fyrirtækið úr Stjörnugrófinni. 

Þar segir jafnframt: „Í þeirri stefnu sem sett hefur verið í samgöngum á höfuðborgarsvæðinu er sérstakt að það eigi að hvetja borgarbúa til að keyra yfir 100 kílómetra í gróðrarstöð til að kaupa trjágróður, fjölæringa og sumarblóm til að fegra og bæta umhverfi sitt á höfuðborgarsvæðinu.“

Í síðasta tölublaði Bændablaðsins var viðtal við Guðmund Verharðsson, garðyrkjufræðing og eiganda Markar, þar sem hann sagði að ákvörðun sem tekin var árið 2008, án samráðs, geti nú leitt til lokunar fyrirtækisins. 

Gróðrastöðin Mörk hefur starfað í Fossvogsdalnum í nær sex áratugi, eða frá árinu 1967. Leigusamningur fyrirtækisins um lóðina sem það stendur á féll úr gildi árið 2016 og þrátt fyrir ítrekaðar beiðnir hefur hann ekki verið framlengdr. Framtíð fyrirtækisins er nú í uppnámi vegna áforma um að stækka athafnasvæði knattspyrnufélagsins Víkings. „Eins og þetta blasir við okkur er verið að leggja niður gróðrarstöð fyrir bílastæði fyrir Víking,“ sagði Guðmundur í viðtali við Bændablaðið.