Bændablaðið kennsluefni
Höfundur: Þröstur Helgason
Í 10. bekk Húnaskóla er Bændablaðið notað sem kennsluefni í íslensku. Nemendur lesa blaðið sem hluta af verkefni í tengslum við gagnvirkan lestur þar sem þau skiptast á að lesa greinar úr blaðinu og ræða svo innihaldið sín á milli.
Freyja Ólafsdóttir og Ragnheiður Ólafsdóttir, íslenskukennarar í 10. bekk, hafa staðið fyrir þessu verkefni og hefur það vakið mikla lukku hjá nemendum sem finnst flestum áhugavert og fræðandi að lesa blaðið.
Húnaskóli er staðsettur á Blönduósi og er grunnskóli sveitarfélagsins Húnabyggðar. Nemendur eru um 180 og eru nemendur bæði íbúar á Blönduósi og úr sveitunum í kring. Í 10. bekk eru t.d. 8 af 25 nemendum búsettir í dreifbýli.
