Enn lengur á Biðstofunni, takk!
Nú er að hefjast ein skemmtilegasta sjónvarpsveisla ársins með Evrópumótinu í handbolta. Íslenska liðið er talið eiga greiða leið í milliriðla og jafnvel í undanúrslit þótt þar sé ekki á vísan að róa eins og síðustu stórmót hafa kennt okkur. En það verður gaman að fylgjast með og ljóst að stór hluti landsmanna mun sitja eins og límdur við sjónvarpið þegar leikir íslenska landsliðsins fara fram.
RÚV hefur sinnt þessum keppnum vel á undanförnum árum og er sífellt að bæta sig. Þar hefur ríkismiðillinn einkum sótt í smiðju frábærrar íþróttaumfjöllunar á systurstöðvum sínum, Sjónvarpi Símans og þó einkum Stöðvar 2 sem nú heitir Sýn. Þar hefur verið þróuð dagskrárgerð í kringum íþróttir á borð við körfubolta, ekki síst NBA, sem gengur út á að fá sérfræðinga í íþróttinni til þess að ræða fram og til baka um allar hliðar hennar, allt frá minnstu tækniatriðum til herkænskubragða, andlegra og jafnvel félagslegra þátta. Slíkir umræðuþættir hafa svo auðvitað orðið mikilvægur hluti af fótboltaumfjöllun þessara sjónvarpsstöðva, ekki síst enska boltans en einnig meistaradeildar Evrópu.
Fyrir áhugafólk um íþróttirnar jafnt sem lengra komna er rýni og greining af þessu tagi ákaflega áhugaverð. Þegar vel tekst til slagar þáttur af ítarlegum og spaklegum umræðum jafnvel upp í ánægjuna af því að horfa á kappleikina sjálfa.
RÚV hefur smám saman verið að læra þáttagerð af þessu tagi og framleitt stutta röð þriggja þátta fyrir Evrópumótið sem er fram undan. Þættirnir heita Biðstofan (sbr. EMstofan) og eru nú allir aðgengilegir í spilara RÚV. Þar ræðir Helga Margrét Höskuldsdóttir við þá Kára Kristján Kristjánsson, Ólaf Stefánsson og Loga Geirsson um mótið, leikmennina og hvernig þeir sjá fyrir sér að íslenska liðið muni spila. Í síðasta þættinum bætist Aron Pálmason svo við þríeykið en hann hefur nýlokið atvinnumannaferli sínum og lék á síðasta stórmóti í janúar á síðasta ári. Hann hefur því ferska sýn á liðið og ekki síður þjálfarann, Snorra Stein Guðjónsson, sem er nú að fara á sitt þriðja stórmót með liðið.
Vel tekst til með þættina og í raun er eini galli þeirra sá að þeir eru of stuttir og of fáir. Eftir að hafa horft á þá alla situr maður eftir með þá tilfinningu að þessir fjórir fyrrverandi landsliðsmenn hefðu getað setið við mun lengur og rætt það sem er yfirvofandi á Evrópumeistaramótinu. Og sem áhorfandi hefði ég alveg verið til í að hlusta og horfa lengur, fá enn frekari sýn á það sem gengur á í undirbúningi fyrir mót af þessu tagi, enn betri innsýn í kerfin sem á að spila, andstæðinga sem okkar lið mætir, mögulega framvindu mótsins, helstu kosti og galla liðs okkar og andstæðinganna og þannig mætti áfram telja.
Hafandi fylgst með mörgum talsvert lengri umræðuþáttum um til dæmis NBA undir stjórn eins af meisturum þáttagerðar af þessu tagi, Kjartans Más Kjartanssonar á Sýn, þá finnst manni að Helga Margrét hefði mátt sitja lengur á Biðstofunni með gestum sínum og kannski leika sér aðeins með formið. Þættirnir þrír eru nefnilega ekki nema tæpir þrír tímar í heild sinni.
En hvað um það. Áhugafólk um íþróttir getur hlakkað til næstu vikna þegar Evrópumótið í handbolta verður á dagskrá RÚV. Kannski má benda Ríkisútvarpinu á að þeim er jafnframt óhætt að gera meira úr umræðum um mótið meðan á því stendur, fyrir og eftir leiki. Þar hefur tíminn einnig verið naumt skammtaður og iðulega fleygaður af stórum auglýsingapökkum. Sú þáttagerð skilur jafnvel enn frekar eftir þá tilfinningu að ekki nándar nærri allt hafi verið sagt. Þar er RÚV að missa af tækifæri sem systurstöðvarnar myndu alveg örugglega ekki láta renna sér úr greipum ef þær sýndu frá mótinu.
