Á flestan hátt jákvætt
Öll skinn sem í boði voru á fyrsta uppboði ársins hjá Köbenhagen Furs seldust upp og verð var yfirleitt hærra en á síðasta uppboði að sögn Einars E. Einarssonar, ráðunauts hjá RML og loðdýrabónda að Syðra- Skörðugili í Skagafirði.
„Uppboðið var á flestan hátt mjög jákvætt. Kaupendur voru tæplega fjögur hundruð og uppboðið hófst á sölu á refaskinnum sem hefði mátt ganga betur. Minkaskinn seldust aftur á móti mjög vel, sum skinnin hækkuðu en önnur lækkuðu frá síðasta uppboði og minkaskinnin seldust upp. Skinnin sem hækkuðu mest voru sjaldgæfustu litirnir og hækkunin á sumum þeirra í kringum 20%. Svo mikil hækkun er samt villandi og á ekki við um megnið af skinnunum þar sem framboðið á sjaldgæfustu litunum er mjög lítið,“ segir Einar.
Kaupglaðir kaupendur
Á Íslandi er framleitt mest af brúnum skinnum og verðið á þeim lækkaði um 8% en á móti kom að þau seldust öll upp. „Þrátt fyrir það var uppboðið mun betra en ég átti von á enda kaupendur kaupglaðir að mínu mati.“
Einar segir að uppboðið núna geti bent til að næsta uppboð sem verður 8. til 15. febrúar geti líka verið gott en lengra nái það ekki. „Markaðurinn er mjög breytilegur og ómögulegt að segja hvernig hann þróast þegar líður á árið.“
Lítið um íslensk skinn
Að sögn Einars voru ekki nema tæp 9.000 íslensk skinn á uppboðinu að þessu sinni en yfir árið eru þau um 190.000. „Skilafresturinn fyrir fyrsta uppboð ársins er okkur óhagstæður og því erfitt fyrir Íslendinga að senda mikið af skinnum á það.“
Einar segir erfitt að bera saman verðið sem fékkst fyrir íslensku skinnin og skinn frá öðrum löndum þar sem íslensku skinnin hafi verið fjölbreytt og í litlum einingum. Hann segist aftur á móti eiga von á að það verði milli 20 og 30 þúsund íslensk skinn á uppboðinu í febrúar og að eftir það verði hægt að bera saman verð á íslenskum skinnum og skinnum frá öðrum löndum.
Gott fyrir sálina
„Í mínum huga var þetta uppboð fyrst og fremst gott fyrir sálartetrið og vekur hjá mönnum bjartsýni um framhaldið. Skinnin seldust og oftar en ekki á hærra verði en á síðasta uppboði.
Markaðurinn er fyrir hendi og tískukóngar í auknum mæli farnir að nota skinn í sína hönnun og vetur að ganga í Kína og þá eykst eftirspurnin,“ segir Einar E. Einarsson, ráðunautur og loðdýrabóndi.
