Það er ekki ýkja langt síðan doði í kúm var talinn nær óhjákvæmilegur fylgifiskur afurðahárra mjólkurkúa og þekkja flestir kúabændur einkennin vel, en þau birtast þannig að kýr liggja skyndilega flatar eftir burð, kraftlausar og ófærar um að standa.
Doði er líklega einn þekktasti sjúkdómurinn sem kýr fá, fyrir utan júgurbólgu, og er tíðni hans um það bil 5%. Tíðnin hækkar venjulega með aukinni nyt og aukinni tíðni mjaltaskeiða en kýr á fyrsta mjaltaskeiði fá sjaldan þennan sjúkdóm þar sem þær mjólka minna og líkami þeirra er betur fær um að takast á við breyttar aðstæður en líkamar eldri kúa.
