Tollkvóti vegna innfluttra landbúnaðarvara frá ESB framlengdur

Í ljósi þeirra aðstæðna sem uppi eru vegna stríðsins í Úkraínu hefur Svandís Svavarsdóttir matvælaráðherra framlengt tímabil til ráðstöfunar tollkvóta vegna innfluttra landbúnaðarvara frá ríkjum Evrópusambandsins.

Tímabilin sem runnið hefðu út þann 30. apríl 2022 verða framlengd til 30. júní 2022. Ákvörðunin er tekin meðal annars með tilliti til erindis sem barst frá Félagi atvinnurekenda.

Um er að ræða tollkvóta sem var úthlutað í desember 2021 til fjögurra mánaða og eiga rót sína að rekja til fríverslunarsamnings sem Ísland er aðili að. Samkvæmt erindi Félags atvinnurekenda hefur orðið snúnara að útvega ýmsar vörur eftir að stríðið í Úkraínu skall á.

Þrátt fyrir að ekki sé beinlínis skortur á vörum þá þurfi innflutningsfyrirtæki að hafa meira fyrir því að útvega vörur á hagkvæmu verði. Þá er einnig vísað til þess að ef ekki er unnt að nýta tollkvótann þá leiði það til lægri birgðastöðu auk þess sem verð á vörum hækkar en hvorugt sé í þágu fæðuöryggis.