Styrkir frá NordForsk
Þrjú íslensk verkefni fengu styrk frá NordForsk í mánuðinum. Þau tengjast náttúruvísindum og verkfræði.
NordForsk bárust alls 32 umsóknir og fengu 15 svokölluð net úthlutað fjármagni. Ísland tekur þátt í þremur þeirra og leiðir eitt, allt á vegum Háskóla Íslands. Frá þessu greinir á vef Rannís.
NextGen Nordic Geotechnics: Að brúa sjálfbærni, verkfræði og ný rannsóknasvið, er eitt af verkefnunum þremur. Lýtur það að því að byggja upp norrænt tengslanet ungra jarðtækniverkfræðinga frá Íslandi, Noregi og Finnlandi, sem þróar nýjar, sjálfbærar og stafrænar lausnir við jarðvegs- og loftslagsáskorunum á Norðurlöndum.
Annað verkefnið nefnist Nordic Palaeo Alliance og snýst um að efla norrænt samstarf ungs jarðvísindafólks frá Íslandi, Danmörku og Svíþjóð, sem leitast við að fínstilla aldursgreiningu á jökulruðningum og loftslagsskrám til að greina viðbragðstíma jökuljaðra, tengsl hegðunar jökla við drifkrafta og bæta líkanreikninga.
Þriðja verkefnið kallast NextGen-WBG. Rannsóknin fjallar um að efla norrænt samstarf ungra vísindamanna á sviði breiðbandsbils-hálfleiðara sem gegna lykilhlutverki í grænni og stafrænni framtíð Evrópu. Samstarfslönd eru Noregur, Finnland, Svíþjóð og Ísland.
NextGen-WBG netið sameinar nýliða í rannsóknum á efnum á borð við SiC, GaN og demant, sem gera rafbúnaði kleift að verða skilvirkari, endingarbetri og orkusparandi. Markmiðið er að tengja saman 12 rannsóknarhópa frá Norðurlöndum og Litáen og efla þekkingu um alla virðiskeðjuna.
NordForsk er norræn stofnun sem starfar á vegum Norrænu ráðherranefndarinnar um menntun og rannsóknir. Hlutverk hennar er að hafa umsjón með samstarfi á sviði rannsókna og rannsóknamenntunar á Norðurlöndunum. Hámarksfjármögnun fyrir hverja tillögu er venjulega um 2,5 milljónir norskra króna, samsvarandi rúmlega 32 milljónum íslenskra króna.
