Nýr framkvæmdastjóri ráðinn

Hestamannafélagið Sprettur á höfuðborgarsvæðinu hefur ráðið Berglindi Guðmundsdóttur í fullt starf sem framkvæmdastjóra.

Berglind hefur stundað hesta- mennsku í mörg ár en hún er menntaður viðskiptafræðingur með meistaragráðu í fjárfestingastjórnun. Á árunum 20152017 sat Berglind í stjórn Spretts, var gjaldkeri félagsins og þekkir því vel til rekstursins.

„Ég mun hefja störf í byrjun mars og hlakka mikið til að takast á við nýtt hlutverk og fá tækifæri til að vinna fyrir það öfluga félag sem hestamannafélagið Sprettur er. Hlutverk framkvæmdastjóra er í grunninn að tryggja að daglegur rekstur félagsins gangi vel, styðja stjórn í stefnumótun, skipulagi og fjármálum félagsins ásamt því að vera í góðum samskiptum við félagsmenn, samstarfsaðila og bæjarfélögin. Það er mikilvægt að hlúa vel að félaginu og því fjölbreytta starfi sem þar er,“ segir Berglind.

Sprettur er eitt af stærstu hestamannafélögum landsins með um 1300 félagsmenn í dag og tilheyrir félagið bæði Kópavogi og Garðabæ.

Í Spretti hafa félagsmenn aðgang að skemmtilegum reiðleiðum, reiðvöllum og tveimur reiðhöllum sem eru vel nýttar til þjálfunar, námskeiðs- og keppnishalds. En hvernig metur Berglind stöðu hestamennskunnar?

„Staða hestamennskunnar á Íslandi er almennt góð og hestamenn metnaðarfullir bæði í tengslum við mótshald, námskeið, reiðleiðir, ferðalög um landið okkar, uppbyggingu aðstöðu og ræktun. Fjöldi barna og ungmenna er töluverður í félaginu og áhugi fyrir hestamennskunni mikill. Hestamennska hefur mikið forvarnargildi líkt og önnur íþróttaiðkun og því er mikilvægt að hlúa vel að unga fólkinu og styrkja það í áhugamálinu,“ segir Berglind og bætir við. „Hestarnir hafa verið hluti af mínu lífi frá barnsaldri, tengslin við hrossin, náttúruna og að sjálfsögðu allt frábæra fólkið í kringum þessa íþrótt gerir þetta svo skemmtilegt og nærandi.“

Berglind segir mikla spennu fyrir Landsmóti hestamanna, sem fer fram á Hólum í Hjaltadal í sumar. „Jú, það er gríðarlega spennandi að landsmót sé fram undan, það er alltaf mikil stemning í kringum þessi stórmót og að sjálfsögðu stefnir Sprettur á að mæta sterkt til leiks á Landsmóti í sumar með öflugan hóp knapa og hesta,“ segir Berglind.