Hús byggð úr íslenskum nytjavið
Nú stendur til að byggja tvö einbýlishús úr íslenskum nytjaviði í nýjum byggðakjarna í Fljótsdal á jörð sem heitir Hamborg.
Um verður að ræða 25 íbúða kjarna þar sem húsin tvö verða. „Þetta er hugsað þannig að bændur í Fljótsdal voru þeir fyrstu sem hófu markvissa bændaskógrækt á jörðum sínum um 1970. Þar sem töluverður nytjaviður er nú þegar farinn að falla til, væri það rökrétt að Fljótsdælingar byggðu fyrstu íbúðarhúsin á landinu úr íslenskum nytjavið. Í dalnum er sögunarstöð á bújörðinni Víðivöllum ytri og heitir stöðin Skógarafurðir ehf. Skógarafurðir útvega efni og saga hjá sér, burðarvirki, klæðningar úti og inni, hurðir og glugga. Timbrið er að mestu héðan úr dalnum en efnið í burðarvirkið er sitkagreni úr Öskjuhlíð, í þetta fyrra hús. Tandrabretti á Eskifirði festi kaup á því timbri og seldi okkur það. Aðallega verður notað í húsin lerki, ösp og sitkagreni og hugsanlega eitthvað af stafafuru,“ segir Helgi Gíslason, sveitarstjóri Fljótsdalshrepps.
Einar Birgir Kristjánsson, sem á og rekur Tandrabretti, segir verkefnið með húsin tvö vera frábært. „Já, já, þetta leggst allt mjög vel í mig og vonandi nær þessi nýi byggðakjarni, sem þarna hefur verið skipulagður vinsældum og verður fljótt fullbyggður. Við eigum mestallt Öskjuhlíðartimbrið til enn þá og það hentaði vel í burðarviði húsanna. Við stóðum líka fyrir því að haldið var námskeið í Hallormsstað í að styrkleikaflokka þetta timbur, svo hægt væri að nota þetta timbur í byggingar og sóttum það ásamt þeim sem reka sögunarmyllu í Fljótsdal. Þetta er skemmtilegt verkefni en til þess að þetta geti orðið alvöru valkostur í framtíðinni þarf úrvinnsla að þróast talsvert. Þarf stærri og sjálfvirkari sögunarmyllur svo að íslenskt timbur geti verið samkeppnisfært við innflutt timbur,“ segir Einar Birgir.
