Metfjöldi nemenda og nýjar námsleiðir
Metfjöldi nemenda er skráður í Háskólann á Bifröst í haust. Þetta er annað árið í röð sem metfjöldi sest á skólabekk á Bifröst auk þess sem nýjar námsleiðir standa til boða, líkt og grunndiplóma í leiðtoganámi í hafgæslu og meistaranám í fjármálastjórnun.
Tæplega 1.900 nemendur eru skráðir í nám við Háskólann á Bifröst annað árið í röð og eru 826 af þeim nýskráðir. Þrjár deildir eru við skólann, viðskiptadeild, félagsvísindadeild og lagadeild, auk þess sem boðið er upp á háskólagátt og endurmenntun.
Námið alltaf í endurnýjun
Dr. Ólína Kjerúlf Þorvarðardóttir, rektor Háskólans á Bifröst, telur að ástæðan fyrir aukningu sé tvíþætt. „Fyrir þremur árum ákváðum við að fella niður skólagjöld og taka við opinberri fjármögnun. Það þýddi að nemendur skólans þurftu ekki lengur að greiða skólagjöld, heldur bara innritunargjald sambærilegt því sem er við Háskóla Íslands og aðra opinbera háskóla, þetta olli mikilli aðsóknaraukningu. Háskólinn á Bifröst gætir þess einnig alltaf að vera með nýtt námsframboð og er alltaf með sitt námsframboð í endurskoðun og endurnýjun.“ Vinsælasta námsleiðin í meistaranámi á Bifröst er forystu- og mannauðsstjórnun sem er kennd innan viskiptadeildar skólans, en hún er einnig fjölmennasta deildin. Greinar líkt og áfallastjórnun og skapandi greinar í félagsvísindadeild hafa einnig notið vinsælda.
Tvær nýjar námslínur eru í boði í ár en síðustu ár hafa ýmsar nýjar námsleiðir verið settar á laggirnar. „Við byrjuðum til dæmis með meistaranám í samskiptastjórnun í fyrra og í hittifyrra grunnnám í öryggisfræðum og almannavörnum við félagsvísindadeild,“ segir Ólína. „Við erum núna að fara af stað með nýja fjármálastjórnunarlínu sem virðist ætla að slá í gegn. Við erum alltaf mjög meðvituð um samfélagstengsl, tengsl við atvinnulífið og samfélagsleg áhrif þess sem við höfum í boði.“
Námið hefur engin landamæri
Allt nám við Háskólann á Bifröst er í fjarnámi og að sögn Ólínu leggur skólinn áherslu á að vera í fararbroddi í þeim málum. „Það er okkar álit að fjarnámið sé það sem koma skal í háskólamenntun á Íslandi. Fjarnámið gerir fólki kleift að stunda sitt nám óháð búsetu, óháð þjóðfélagsstöðu og óháð ytri aðstæðum, þannig að um leið og við fellum niður skólagjöldin og bjóðum upp á fjarnám þá eru afar fáar ytri hindranir fyrir fólk til að stunda háskólanám.“
Ásamt því að vera með nemendur í öllum landshlutum á Íslandi eru margir nemendur erlendis sem stunda fjarnám við skólann. „Flestir fjarnemar okkar eru á höfuðborgarsvæðinu en dreifast annars nokkuð jafnt yfir landsbyggðina. Svo erum við líka með nemendur í Evrópu, í Bandaríkjunum og í Ástralíu. Þetta eru bæði Íslendingar sem búa erlendis og eru í námi og svo erlendir nemendur. Það eru engin landamæri í fjarnáminu,“ segir Ólína.
Í tengslum við atvinnulífið
Námið á Bifröst er í góðum tengslum við atvinnulífið. „Við höfum verið með nemendur í starfsnámi hjá mismunandi fyrirtækjum og höfum í endurmenntuninni verið með samninga við stofnanir og fyrirtæki. Við fórum til dæmis að kenna íslensku fyrir erlenda nemendur í samstarfi við Landspítalann og við höfum tekið að okkur að útbúa endurmenntunarpakka fyrir aðila í atvinnulífinu til að efla faglega hæfni fólks,“ segir Ólína.
Stjórnendur og starfsfólk háskólans eru bjartsýn fyrir skólaárinu og áframhaldandi uppbyggingu skólans. „Galdurinn er auðvitað sá að vera alltaf á tánum við að svara samfélagslegum þörfum um leið og við reynum að tryggja að gæði námsins séu góð. Við erum alltaf með klassískt háskólanám en við stillum það af og leggjum mjög mikið upp úr samfélagslegum tengslum og áhrifum.“ segir Ólína.
