Ungir heimsmeistarar í hestaíþróttum

Ungu knaparnir íslenska landsliðsins hafa verið að slá í gegn á heimsmeistara móti íslenska hestsins sem fram fer í Oirscot í Hollandi.

Á fimmtudag sigraði Konráð Valur Sveinsson gæðingaskeið ungmenna og í dag bættust tvö gull við til íslenska landsliðsins.

Gústaf Ásgeir Hinriksson og Pistill frá Litlu-Brekku sigruðu í fjórgangi. Þeir komu inn í úrslit í efsta sæti og héldu því allt til loka. Önnur varð Filippa Helltén frá Svíþjóð og Máni frá Galtanesi og samlanda hennar Yrsa Danielsson og Hector från Sundsby voru þriðju.

Gústaf Ásgeir og Pistill sigruðu fjórgangskeppni ungmenna. Mynd/Jacco Suijkerbuijk

Aðeins þrjú ungmenni kláruðu úrslit fjórgangsins. Annar fulltrúi íslenska landsliðsins, Anna Bryndís Zingsheim þurfti að hætta keppni eftir að hryssan hennar, Náttrún vom Forstwald , missti skeifu. Olivia Ritschel og Alvar frá Stóra-Hofi frá Þýskalandi hætti einnig keppni þegar ungmennin sýndu brokk.

Eins fóru Máni Hilmarsson og Prestur frá Borgarnesi alla leið í úrslitum fimmgangs ungmenna. Þeir tryggðu sér sigur með því að hljóta langhæstu einkunn keppenda fyrir skeið. Í öðru sæti varð Sasha Sommer og Kommi fra Enighed frá Danmörku og Elsa Teverud frá Svíþjóð og Bíða frá Ríp urðu þriðju.

Á morgun fara fram A-úrslit í öllum hringvallargreinum fullorðinna. Bein útsending er frá hestaveislunni á vefsíðunni oz.com