Feitur ostur getur minnkað hættu á heilabilun
Samkvæmt nýrri rannsókn við Háskólann í Lundi er hægt að tengja neyslu á feitum osti við minni líkur á að eldri einstaklingar þrói með sér heilabilun.
Emily Sonestedt, lektor í faraldsfræði og samstarfsmenn hennar við Háskólann í Lundi, vildu kanna hvort neysla á feitum osti gæti minnkað líkurnar á heilabilun. Fylgst var með tæplega 28 þúsund einstaklingum yfir 25 ára tímabil, en meðalaldur þátttakenda við upphaf rannsóknarinnar var 58 ár. Meðan á rannsókninni stóð þróuðu 3.208 þátttakendur með sér heilabilun.
Eftir að leiðrétt hafði verið fyrir lífsstílsþáttum, eins og hreyfingu, matarvenjum, reykingum og áfengisneyslu, sáu rannsakendurnir að þeir sem átu að jafnaði 50 grömm af feitum osti á degi hverjum voru 13 prósent ólíklegri til að þróa með sér heilabilun, samanborið við hópinn sem át minna en 15 grömm á dag. Á gögnunum mátti jafnframt sjá neikvæða fylgni milli neyslu á rjóma og að þróa með sér heilabilun. Niðurstöður rannsóknarinnar sýna ekki sömu verndandi áhrif á heilsu heilans af neyslu mjólkurvara með lágt fituinnihald.
Þátttakendur svöruðu spurningum um matarvenjur og fengust upplýsingar um heilabilun úr sjúkraskrám. Fjórðungur þátttakenda borðuðu að jafnaði meira en 50 grömm af feitum osti á dag, en þá er átt við ost með meira en 20 prósent fitu. Í frétt á heimasíðu Háskólans í Lundi segir Emily Sonestedt að þegar horft er til tiltekinna tegunda af heilabilun þá eru 29 prósent minni líkur á æðaheilabilun hjá hópnum sem borðaði meira af feitum osti. Eins minnkaði neysla á feitum osti verulega líkurnar á Alzheimer-sjúkdómi hjá þeim sem báru ekki APOE e4 genabreytinguna sem er áhættuþáttur fyrir Alzheimer.
