3.750 holdakýr eru í landinu

Bændasamtök Íslands í samvinnu við Ráðgjafarmiðstöð landbúnaðarins (RML) stóðu fyrir könnun um nautakjötsframleiðslu á Íslandi nú í janúar 2026.

Tilgangur könnunarinnar var tvíþættur, að sögn Guðrúnar Bjargar Egilsdóttur hjá Bændasamtökunum.

„Já, það var að reyna að leggja mat á áætlaða fjárfestingaþörf í nautakjötsframleiðslu á Íslandi en könnunin er einnig hluti af verkefni RML, sem ber nafnið „Framtíðaraðstaða fyrir holdakýr – greining, hönnun og áhrif á búrekstur“ en það verkefni er styrkt af þróunarsjóði nautgriparæktarinnar.

Hitt er markmið RML vegna hluta verkefnisins en það er að greina og meta raunverulega þörf á uppbyggingu á aðstöðu fyrir holdakýr, sem nýtist til að meta fjárfestingaþörf þeirra nautakjötsframleiðenda sem eru með slíkan búskap,“ segir Guðrún Björg.

Könnunin var lögð fyrir alla nautakjötsframleiðendur á Íslandi og valkvætt var að svara henni. Sömuleiðis er valkvætt að svara ekki öllum spurningum. Allar niðurstöður, sem birtar verða, verða órekjanlegar til einstakra svarenda. Samkvæmt upplýsingum frá RML voru holdakýr í nóvember 2025 3.750 talsins í landinu.