Undanþágan beint til Hæstaréttar
Hæstiréttur samþykkti að taka fyrir mál Samkeppniseftirlitsins og Innnes ehf. án þess að það fari fyrst fyrir Landsrétt.
Samkeppniseftirlitið leitaði eftir leyfi til að áfrýja beint til Hæstaréttar, dómi Héraðsdóms Reykjavíkur frá því í nóvember. Forsaga málsins er sú að Samkeppniseftirlitið hafnaði beiðni Innnes ehf. um að grípa til íhlutunar gagnvart háttsemi framleiðendafélaga á grundvelli undanþáguheimilda frá samkeppnislögum sem settar voru fyrr á árinu.
Málið fékk flýtimeðferð innan Héraðsdóms Reykjavíkur. Í dómi hans er ákvörðun Samkeppniseftirlitsins felld úr gildi því dómurinn taldi undanþáguheimildina ekki hafa lagagildi því tildrög lagabreytingarinnar hafi strítt gegn stjórnarskránni. Dómurinn taldi að frumvarp, sem síðar varð að lögum, hafi aðeins fengið tvær umræður en ekki þrjár eins og áskilið er í stjórnarskránni.
Frá því undanþáguheimildirnar tóku gildi hefur Kaupfélag Skagfirðinga keypt Kjarnafæði Norðlenska og fyrir lá samþykkt kauptilboð kaupfélagsins í sláturhús B.Jensen þegar dómur héraðsdóms var kveðinn upp. Þá höfðu töluverðar breytingar verið fyrirhugaðar á sláturfyrirkomulagi og kjötvinnslu á Norðurlandi.
Í ákvörðun Hæstaréttar frá 18. desember sl. segir að dómurinn geti haft fordæmisgildi og verulega almenna þýðingu, meðal annars um túlkun stjórnarskrárinnar og endurskoðunarvald dómstóla varðandi stjórnskipulegt gildi laga. Því veitti dómurinn leyfi til áfrýjunar beint til dómsins.
Hæstiréttur synjaði hins vegar fjórum málskots- beiðnum vegna sama máls. Kaupfélag Skagfirðinga, Búsæld, Neytendasamtökin og íslenska ríkið höfðu öll óskað eftir að koma sjónarmiðum sínum á framfæri. Í ákvörðun Hæstaréttar segir þó að ekki sé loku fyrir það skotið að heimild kunni að standa til aukameðalgöngu aðilanna fyrir réttinum. Það verði hins vegar undir dómurum málsins í Hæstarétti komið.
