Stærsta hundagerði landsins reist

Hvutti, hagsmunafélag hunda á Suðurnesjum, ætlar sér að byggja 10.500 fermetra hundagerði á svæði bak við Reykjaneshöllina í Reykjanesbæ.

Stefnt er að því að svæðið verði með fjölbreyttum leiktækjum fyrir bæði tví- og ferfætlinga, lýsingu á svæðinu og góðum skýlum þar sem fólk getur setið í skjóli fyrir veðri og vindum. Göngustígar verða gegnum grassvæði sem verður með litlum hæðum og hólum. Hönnuður svæðisins er Bjarnheiður Erlendsdóttir.

Ævar Eyjólfsson er formaður Hvutta og hvatamaður að stofnun þess. „Félagið var stofnað með það að markmiði að bæta aðstöðu til útivistar hunda og eigenda þeirra á Suðurnesjum, og veita stuðning við uppbyggingu hundagerða sem uppfylla þarfir samfélagsins.

Góð aðstaða fyrir hunda er lykilatriði fyrir vellíðan þeirra og eigenda. Hundagerðið mun bjóða upp á öruggt umhverfi fyrir leik og samveru en það verður það stærsta á Íslandi,“ segir Ævar en hagsmunafélagið var stofnað í nóvember 2022.

– En hvað með kostnaðinn við hundagerðið?

„Það hefur hvorki verið gerð verk- né kostnaðaráætlun því þetta verður spilað af fingrum fram. Ég gæti þó trúað að kostnaðurinn yrði um fimmtán milljónir króna en við ætlum að reyna að fá styrk frá Reykjanesbæ og fyrirtækjum, auk hundavina,“ segir Ævar.

Bjarnheiður teiknaði svæðið upp í þrívídd, sem gefur mjög skýra mynd af því hvernig hugmyndirnar eru hugsaðar og hvernig svæðið kemur til með að líta út að verki loknu. „Þetta svæði er hugsað sem sameiginlegt hundum og fjölskyldum þeirra sem og öðrum hundavinum. Hundarnir geta hlaupið frjálsir um eða leikið sér í þar til gerðum leiktækjum fyrir hunda og eigendur þeirra geta þjálfað þá sé til þess vilji. Börn hafa leiktæki fyrir sig og æfingatæki eru til staðar fyrir fullorðna.

Þetta er því ekki einungis svæði fyrir hunda heldur alhliða svæði þar sem hundar og menn geta notið lífsins saman í sátt og samlyndi,“ segir Bjarnheiður