Ákveðnir veikleikar í eftirliti
Ákveðnir veikleikar eru í eftirliti með framleiðslu á ávöxtum og grænmeti hér á landi. Meginniðurstaða úttektarinnar er þó að Ísland hefur komið á fót virku opinberu eftirliti með matvælum úr plönturíkinu og að framleiðendur þessara afurða sæta reglubundnu eftirliti.
Þetta kemur fram í skýrslu eftirlitsstofnunar EFTA (ESA) sem byggð er á úttekt sem fór fram hér á landi 8.–17. september 2025.
Í skýrslunni leggur ESA fram tilmæli um að bæta samræmi og samvinnu milli mismunandi eftirlitsaðila. Einnig þarf að tryggja að sýnatökur og greiningar vegna örveruöryggis séu fullnægjandi og framkvæmdar í samræmi við löggjöf. Að síðustu þarf að tryggja að framleiðendur spíra framkvæmi viðeigandi sýnatökur og greiningar, eins og löggjöf mælir fyrir um.
Tilgangur úttektarinnar var að meta hvort opinbert eftirlit með tilgreindum afurðum sé í samræmi við löggjöf EES á sviði matvælaöryggis og að leggja mat á skilvirkni eftirlitsins. Áhersla var á eftirliti með niðurskornum ávöxtum og grænmeti, grænu blaðsalati, berjum og spírum, einkum með tilliti til örverufræðilegs öryggis.
Niðurstöður eftirlits ESA eru settar fram í lokaskýrslu og með skýrslunni fylgir tímasett úrbótaáætlun yfirvalda (Matvælastofnun og Heilbrigðiseftirlit sveitarfélaga). Vinna við úrbætur er hafin, eftir því sem segir í fréttatilkynningu frá MAST.
