Nýr vefblaðamaður

Katrín Lilja Jónsdóttir hefur tekið til starfa sem vefblaðamaður hjá Bændablaðinu. Hennar verkefni snúa helst að fréttaskrifum og umsjón með vefnum bbl.is.

Síðustu ár hefur Katrín starfað sem ritstjóri hjá Storytel og mun hún sinna verkefnum áfram á þeim vettvangi.Hún segist áhugasöm um áframhaldandi framleiðslu á hlaðvarpsþáttum og vonast til að geta komist í slík verkefni fyrir Bændablaðið. Þá vill hún koma vefsíðu Bændablaðsins, bbl.is, mjög á skrið og ná til breiðari lesendahóps en prentútgáfa blaðsins nær til.

Hún er með BA próf í sagnfræði og MA í blaða- og fréttamennsku frá Háskóla Íslands. Hún hefur gert útvarpsþætti fyrir RÚV, eins og Hver var Sonja de Zorilla? og var lokaverkefni hennar fjögurra þátta sería sem heitir Íslendingar eru heiðnari en þeir halda.

Hún segir verkefnin sem fyrir hana hafa verið lögð bæði fjölbreytt og skemmtileg. Uppeldisstöðvar Katrínar eru á Kalastöðum í Hvalfirðinum þar sem rekið var blandað bú með kúm og kindum, en hún er búsett á Akranesi.