Nýr bæjarstjóri Múlaþings
Bæjarstjóraskipti eru að verða í sveitarfélaginu Múlaþingi.
Dagmar Ýr Stefánsdóttir tekur við starfi sveitarstjóra Múlaþings frá og með 1. febrúar. Um leið lætur Björn Ingimarsson af störfum sem sveitarstjóri. Segir í tilkynningu sveitarfélagsins að vegna yfirfærslu verkefna, uppgjörs vegna ársins 2024 o.fl. muni Björn starfa áfram með nýjum sveitarstjóra til og með 15. mars en þá láta endanlega af störfum hjá sveitarfélaginu Múlaþingi. Björn hefur starfað sem sveitarstjóri Múlaþings frá árinu 2020 en áður var hann bæjarstjóri Fljótsdalshéraðs, frá árinu 2010. Hann var jafnframt sveitarstjóri Þórshafnarhrepps árin 2001–2006 og Langanesbyggðar 2006–2009.
Dagmar Ýr er með BA-gráðu í fjölmiðlafræði frá Háskólanum á Akureyri. Hún var áður framkvæmdastjóri Austurbrúar frá árinu 2023. Fram að því, frá 2013, starfaði hún sem yfirmaður samskipta og samfélagsmála hjá Alcoa Fjarðaáli. Áður starfaði Dagmar sem forstöðumaður markaðs- og kynningarsviðs hjá Háskólanum á Akureyri í fimm ár og var þar áður fréttamaður hjá fjölmiðlafyrirtækinu N4 í eitt ár. Dagmar hefur auk þess setið í ýmsum stjórnum, svo sem í heimastjórn Fljótsdalshéraðs, í fagráði Seyðisfjarðarkaupstaðar, í stjórn Stapa lífeyrissjóðs og í fagráði Uppbyggingarsjóðs Austurlands.
