Nóg af heitu vatni til að kynda öll hús
Í maí 2024 fannst heitt vatn í Tungudal við Ísafjörð, aðeins um þremur kílómetrum frá miðbænum. Mælingar sýndu rennsli upp á 35 lítra á sekúndu og hitastig vatnsins um 56 °C, sem telst afar vænlegt með tilliti til húshitunar með varmadælum.
Samkvæmt útreikningum dugar þessi uppspretta með notkun varmadæla til að kynda öll hús á Ísafirði. „Þetta er mikið gleðiefni fyrir okkur hér og mun klárlega auka lífsgæði íbúa. Nú þegar er hafin vinna við breytingu á aðalskipulagi á svæðinu en í skipulagsvinnunni er unnið að því að skilgreina virkjunarsvæði í Tungudal og gera ráð fyrir nauðsynlegum mannvirkjum, svo sem varmadælustöðvum og lagnaleiðum frá svæðinu. Núverandi kyndistöðvar í bænum verða áfram nýttar, sem hluti af dreifikerfinu,“ segir Sigríður Júlía Brynleifsdóttir, bæjarstjóri Ísafjarðarbæjar.
Lögn lögð í miðbæinn
Það er Orkubú Vestfjarða sem undirbýr nú framkvæmdir og stefnir að því að byggð í nærumhverfi borholunnar í Holtahverfi og Tunguhverfi í Skutulsfirði verði tengd við nýju hitaveituna í fyrsta áfanga. Í kjölfarið verður lögð lögn úr Seljandi í miðbæinn, sem krefst u.þ.b. þriggja kílómetra lagnar.
„Með þessu má draga stórlega úr notkun jarðefnaeldsneytis og notkun á raforku til húshitunar. Helstu kostir við þessar framkvæmdir eru að nýttar verða auðlindir úr jörðu með hagkvæmum hætti, jafnframt eru helstu innviðir til staðar s.s. dreifikerfi. Þannig að ekki kemur til rasks í íbúðagötum og eða tengigötum. Þó þarf að leggja stofnlögn frá borholu að kyndistöð inn á Skeiði, eins og við köllum það, og inn á Ísafjörð,“ bætir Sigríður Júlía við.
