300 milljóna uppgræðsla
Garðar Þorfinnsson og Hreinn Óskarsson frá Landi og skógi (LOGS) mættu nýlega á fund byggðaráðs Rangárþings ytra til að fara yfir framkvæmdir vegna uppgræðslu í sveitarfélaginu tvö sl ár.
Fram kom að LOGS hefur unnið á nokkrum svæðum í sveitarfélaginu að uppgræðslu, skógrækt, endurheimt birkiskóga og annarra landbóta. Flest eiga þessi svæði það sammerkt að vera innan starfssvæðis Hekluskóga. Þá kom fram hjá þeim félögum að veittir voru styrkir til einstaklinga, fyrirtækja og afréttarfélaga og fleiri í gegnum fjögur verkefni hjá LOGS. Í verkefninu Bændur græða landið eru 20 aðilar skráðir, 17 samningar eru í gildi um skógrækt á lögbýlum, sex aðilar fengu styrk úr Landbótasjóði, auk þess sem styrkir eru veittir til skjólbeltaræktunar á lögbýlum.
Í samantekt Garðars og Hreins kemur líka fram að umsvif Lands og skógar hafa verið umtalsverð í sveitarfélaginu á síðustu tveimur árum. Borið hefur verið á tilbúinn og lífrænn áburður á um 2.400 hektara, auk þess sem gróðursett hefur verið um 1,5 milljónir birkiplantna í valin svæði. Jafnframt voru lagðir 4,3 km af slóðum. Áætlaður heildarkostnaður LOGS við framkvæmdir árin 2024 og 2025 eru tæpar 300 milljónir króna í Rangárþingi ytra.
