Matvælasjóður fær aukið fjármagn í fjárlögum

Samkvæmt nýbirtu fjárlagafrumvarpi mun Matvælasjóður fá 250 milljón króna viðbótarframlag á næsta ári við þær tæplega 400 milljónir sem áætlað er að að sjóðurinn hafi árlega til umráða.

Við úthlutun á næsta ári verða því 628 milljónir, en sjóðurinn vinnur nú úr umsóknum fyrir fyrstu úthlutun sjóðsins þar sem 500 milljónir eru til ráðstöfunar. Umsóknarfrestur fyrir þá úthlutun rann út 21. september og bárust þá 263 umsóknir í alla fjóra styrkjaflokkana.

Gert er ráð fyrir að niðurstöður fyrstu úthlutunar verði ljósar um næstu mánaðamót.

Stjórn Matvælasjóð skipa þau Gunnar Þorgeirsson, formaður Bændasamtaka Íslands, Gréta María Grétarsdóttir, formaður stjórnar, Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, og Karl Frímannsson, sviðsstjóri fræðslusviðs Akureyrarkaupstaðar.