Lágvöruverðsverslun gæti risið á Hellu

Viljayfirlýsing um byggingu lágvöruverðsverslunar og annarrar þjónustu á Hellu hefur verið undirritað, en fyrirhugað byggingarsvæði er við Faxaflatir 4, á stórri lóð við þjóðveg 1 þegar ekið er í gegnum þorpið.

Að viljayfirlýsingunni standa annars vegar Drangar hf., sem meðal annars reka Samkaup og Orkuna, og hins vegar Land and Houses ehf. og Cheng Hoon International Development ehf., sem hyggjast byggja verslunar- og þjónustuhús á lóðinni. Drangar hf. hafa lýst áhuga á að setja þar upp matvöruverslun náist samningar milli aðila.

Skipulags- og umferðarnefnd Rangárþings ytra fjallaði nýverið um málið og samþykkti eftirfarandi bókun:

„Unnið er að samkomulagi við verslunarkeðju, sem kallar á stærra húsnæði en nú er gert ráð fyrir á reitnum. Samhliða er óskað eftir að staðsetning á húsnæði færist sunnar sem stækkun nemur til að koma fyrir fleiri bílastæðum fyrir framan í tengslum við verslunarkeðjuna. Núverandi stærð lóðar og stærð á byggingarreit takmarka þessar forsendubreytingar og eru því lykilatriði í þeirri framþróun sem fyrirhuguð er. Viljayfirlýsing liggur fyrir milli aðila til byggingar á verslunarrými fyrir lágvöruverðsverslun á fyrstu hæð.“

Á heimasíðu sveitarfélagsins, www.ry.is, er hægt að kynna sér málið nánar og skoða teikningar og önnur skipulagsgögn.

Jón G. Valgeirsson, sveitarstjóri Rangárþings ytra, segir að verkefnið sé enn á viljayfirlýsingastigi.

„Þetta er nú enn viljayfirlýsing milli lóðarhafans og Dranga, sem sveitarfélagið hefur ekki beina aðkomu að, nema við erum tilbúin að stækka lóðina til að þetta verði að veruleika,“ segir hann.